తీవ్ర వాయుగుండం ఎఫెక్ట్ : ఇవాళ ఏపీలో భారీ వర్షాలు - తెలంగాణకు తేలికపాటి వర్ష సూచన

బంగాళాఖాతంలో తీవ్ర వాయుగుండం ప్రభావం కొనసాగుతోంది. ఈ ప్రభావంతో ఏపీలో ఇవాళ పలు జిల్లాల్లో భారీ వర్షాలు పడొచ్చు. ఈ మేరకు ఐఎండీ హెచ్చరికలను జారీ చేసింది.

ఇవాళ(2 డిసెంబర్ 2025) ప్రకాశం, నెల్లూరు, తిరుపతి జిల్లాల్లో అక్కడక్కడ మోస్తరు నుంచి భారీ వర్షాలు కురిసే అవకాశం ఉంది.

ఇక కాకినాడ, కోనసీమ, తూర్పుగోదావరి పశ్చిమగోదావరి, ఏలూరు, కృష్ణా,ఎన్టీఆర్, గుంటూరు, బాపట్ల, పల్నాడు, రాయలసీమ జిల్లాల్లో తేలికపాటి నుంచి మోస్తరు వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ తెలిపింది.

సోమవారం సాయంత్రం 5 గంటలకు నెల్లూరు(జి) కొడవలూరులో 38.7 మిమీ, నెల్లూరులో36.7 మిమీ, తిరుపతి(జి) తడలో33.5మిమీ వర్షపాతం నమోదైందని ఏపీ విపత్తుల నిర్వహణ సంస్థ తెలిపింది.

ఇక తెలంగాణలో చూస్తే ఇవాళ పలుచోట్ల తేలికపాటి నుంచి ఒక మోస్తారు వర్షాలు పడొచ్చని హైదరాబాద్ వాతావరణ కేంద్రం తెలిపింది. ఎలాంటి హెచ్చరికలు లేవని పేర్కొంది.

ఇక తెలంగాణలో డిసెంబర్ 3వ తేదీ నుంచి పూర్తిగా పొడి వాతావరణమే ఉంటుంది. ఎలాంటి వర్ష సూచన లేదు. హెచ్చరికలు కూడా లేవని హైదరాబాద్ వాతావరణ కేంద్రం తెలిపింది. చలి తీవ్రత కొనసాగుతోంది. ఉదయం సమయంలో పొగమంచు కురిసే పరిస్థితులున్నాయి.