Telangana Rains : తెలంగాణలో ఇవాళ, రేపు అత్యంత భారీ వర్షాలు - పలు జిల్లాలకు రెడ్ అలర్ట్, హైదరాబాద్‌లో ఇలా...

తీవ్రవాయుగుండం ప్రభావంతో తెలంగాణ వ్యాప్తంగా రాబోయే ఐదు రోజుల పాటు వర్షాలు పడే అవకాశం ఉంది. ఈ మేరకు రాష్ట్రంలోని పలు జిల్లాలకు రెడ్, ఆరెంజ్ హెచ్చరికలు జారీ కాగా, గంటకు 30 నుండి 60 కిలోమీటర్ల వేగంతో ఈదురు గాలులు వీచే అవకాశం ఉంది.

ముఖ్యంగా సెప్టెంబర్ 23, 24(ఇవాళ, రేపు) తేదీలలో వర్షాల తీవ్రత ఎక్కువగా ఉంటుందని హైదరాబాద్ వాతావరణ కేంద్రం అంచనా వేసింది. ఇవాళ పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, మహబూబాబాద్, వరంగల్, హన్మకొండ జిల్లాల్లో భారీ నుండి అత్యంత భారీ వర్షాలు కురిసే అవకాశం ఉండటంతో అత్యంత జాగ్రత్తగా ఉండాలని వాతావరణ శాఖ సూచించింది.

సెప్టెంబర్ 24న కొమరం భీమ్ ఆసిఫాబాద్, మంచిర్యాల, కరీంనగర్, పెద్దపల్లి, జయశంకర్ భూపాలపల్లి, మహబూబాబాద్, వరంగల్, హన్మకొండ జిల్లాలకు రెడ్ అలర్ట్ ప్రకటించారు.

మరోవైపు హైదరాబాద్ మరియు దాని పరిసర ప్రాంతాలైన మేడ్చల్-మల్కాజిగిరి, రంగారెడ్డి, సంగారెడ్డి, వికారాబాద్ జిల్లాల్లో కూడా సెప్టెంబర్ 23 నుంచి 26 వరకు తేలికపాటి నుండి మోస్తరు వర్షాలతో పాటు అక్కడక్కడ ఈదురు గాలులతో కూడిన వర్షాలు కురిసే సూచనలున్నాయి. మంగళవారం ఖైరతాబాద్‌లో 3.2 సెం.మీ., కూకట్‌పల్లి 2.8, ముషీరాబాద్‌ 2.5, అబ్దుల్లాపూర్‌మెట్‌ 2.3 సెం.మీ. వర్షం కురిసింది.

హైదరాబాద్ నగరంలో మంగళవారం పలు ప్రాంతాల్లో భారీ వర్షం కురిసింది. ఇవాళ కూడా వర్ష సూచన ఉండటంతో…. లోతట్టు ప్రాంతాల ప్రజలు, వాహనదారులు జాగ్రత్తగా ఉండాలని, విద్యుత్ స్తంభాలు, పాత భవనాల వద్ద నిలబడవద్దని వాతావరణ శాఖ హెచ్చరిస్తోంది.

ఇక సెప్టెంబర్ 25న ఉమ్మడి ఆదిలాబాద్, కరీంనగర్, వరంగల్ మరియు ఖమ్మం జిల్లాల్లో భారీ వర్షాలు నమోదు కావచ్చని అధికారులు హెచ్చరించారు. సెప్టెంబర్ 26 మరియు 27 తేదీలలో ఎలాంటి తీవ్రమైన హెచ్చరికలు లేనప్పటికీ, మోస్తరు జల్లులు పడతాయని పేర్కొన్నారు.