తెలంగాణ ఇంటర్ విద్యార్థులకు అలర్ట్ - ఓసారి మీ వివరాలు చెక్ చేసుకోండి..!

విద్యార్థులకు తెలంగాణ ఇంటర్ బోర్డు ముఖ్యమైన అప్డేట్ ఇచ్చింది. వార్షిక పరీక్షల వేళ పేరుతో పాటు ఇతర వివరాలను పరిశీలించుకోవాలని సూచించింది. ఏమైనా తప్పులుంటే నవంబర్ 30వ తేదీ వరకు ఎడిట్ చేసుకునే అవకాశం కల్పించింది.

ఎగ్జామ్ ఫీజు చెల్లించే సమయంలో విద్యార్థి పేరు, తండ్రి పేరు, గ్రూపు, మీడియం. లాంగ్వేజ్ సబ్జెక్టులు తదితర వివరాల్లో తప్పులు దొర్లుతుంటాయి. ఇలాంటి తప్పులను సరిదిద్దుకునేందుకు ఇంటర్ బోర్డు అవకాశం కల్పించింది.

ఇప్పటికే పరీక్షల ఫీజు చెల్లించిన వారు తమ ఎన్‌ఆర్‌ వివరాల్లో పొరపాట్లను దిద్దుకునేందుకు నవంబర్ 30వ తేదీ వరకు అవకాశమిచ్చింది.

మరోవైపు పరీక్షల చెల్లింపు ప్రక్రియ నడుస్తోంది. బుధవారం (నవంబరి 27) నుంచి రూ.500 ఆలస్య రుసుంతో ఫీజు చెల్లించుకోవచ్చు. అదే రూ.2 వేల ఆలస్య రుసుంతో డిసెంబరు 15వ తేదీ వరకు చెల్లించవచ్చు.

తెలంగాణ ఇంటర్ పరీక్షల షెడ్యూల్ కూడా విడుదలైంది. వచ్చే ఏడాది ఫిబ్రవరి 25వ తేదీ నుంచి ఈ ఎగ్జామ్స్ ప్రారంభమవుతాయి. మార్చి 18వ తేదీతో అన్ని సబ్జెక్టుల పరీక్షలు పూర్తవుతాయి.