బల్లి కాటు వేస్తే ప్రమాదకరమా? కరిస్తే వెంటనే ఏం చేయాలి?

మీ ఇంటి గోడల మీద బల్లులు అటూ ఇటూ తిరగడం మీరు గమనించి ఉండవచ్చు. అవి మీద పడతాయేమోనని కొందరు వాటికి భయపడతారు. మరికొందరు వాటిని అసహ్యించుకుంటారు. ఇప్పుడు వర్షాకాలంలో బల్లుల సంచారం ఎక్కువగా ఉంటుంది. ఈ సమస్య గ్రామీణ ప్రాంతాల్లో సర్వసాధారణం. కొన్నిసార్లు, బల్లులు మనుషుల మీద పడతాయి. లేదా కాటు వేస్తాయి. బల్లి కాటు చాలా ప్రమాదకరమని, అది తీవ్రమైన హాని లేదా మరణానికి కారణమవుతుందని కొందరు భావిస్తారు. అయితే సాధారణంగా ఇంట్లో తిరిగే ఈ బల్లులు కాటు వేస్తే నిజంగా హాని కలుగుతుందా?

నివేదికల ప్రకారం.. ఇళ్లలో సాధారణంగా కనిపించే బల్లులు విషపూరితమైనవి కావు. వాటికి మనుషులను చంపగల ప్రాణాంతకమైన విషం ఉండదు. అందువల్ల బల్లి కాటు వల్ల మరణం సంభవించడం చాలా అరుదు. కానీ ఇతర జంతువుల మాదిరిగానే బల్లి కాటు కూడా చర్మంపై గాయం, చికాకు లేదా ఇన్ఫెక్షన్ వచ్చే ప్రమాదాన్ని పెంచుతుంది. అందువల్ల ఒకవేళ మిమ్మల్ని బల్లి కరిస్తే వైద్యుడిని సంప్రదించడం అవసరం.

ఇంటి గోడలపై పాకే బల్లులు మనుషులకు దూరంగా ఉండటానికి ఇష్టపడతాయి. సాధారణంగా భయపడినప్పుడు లేదా ఎవరైనా వాటిని పట్టుకోవడానికి ప్రయత్నించినప్పుడు మాత్రమే కరుస్తాయి. బల్లులకు చిన్న దంతాలు ఉండటం వల్ల, వాటి కాటు సాధారణంగా తేలికపాటి నొప్పిని మాత్రమే కలిగిస్తుంది. ఒక చిన్న గుర్తు పడవచ్చు.

మిమ్మల్ని బల్లి కాటు వేసినప్పుడు ప్రభావిత ప్రాంతంలో మీకు తేలికపాటి నొప్పి, ఎరుపు లేదా వాపు కలగవచ్చు. సున్నితమైన చర్మం ఉన్న కొందరికి అలెర్జీ ప్రతిచర్య కూడా కలగవచ్చు. దీని కోసం ముందుగా గాయాన్ని సబ్బు, శుభ్రమైన నీటితో క్షుణ్ణంగా కడగాలి. ఆ తర్వాత యాంటీసెప్టిక్‌ను పూసి, గాయాన్ని శుభ్రంగా ఉంచండి. సాధారణంగా బల్లి కాటు తర్వాత తీవ్రమైన సమస్యలు రావడం అరుదు. అయితే బల్లి కాటు తర్వాత మీకు అధిక వాపు, శ్వాస తీసుకోవడంలో ఇబ్బంది, తల తిరగడం లేదా ఇతర అసాధారణ లక్షణాలు కనిపిస్తే, మీరు వెంటనే వైద్యుడిని సంప్రదించాలి.