TG Indiramma Houses : హైదరాబాద్ సిటీలో ఇందిరమ్మ ఇండ్ల స్కీమ్ అప్డేట్ - ఈనెల 27 నుంచి లాటరీ, ఎక్కడ చెక్ చేసుకోవాలంటే..?

హైదరాబాద్ నగరం, గ్రేటర్ హైదరాబాద్ మున్సిపల్ కార్పొరేషన్ (GHMC) క్యూర్‌ పరిధిలోని అర్హులైన పేదలకు ప్రభుత్వం తీపి కబురుందించింది. ప్రభుత్వం ప్రతిష్టాత్మకంగా నిర్మిస్తున్న ఇందిరమ్మ ఇళ్ల టవర్స్‌లో ఫ్లాట్ల కేటాయింపు ప్రక్రియకు హౌసింగ్ బోర్డు సర్వం సిద్ధం చేసింది.

లబ్ధిదారులకు పారదర్శకంగా ఫ్లాట్లను కేటాయించేందుకు ఈ నెల 27వ తేదీ నుంచి లాటరీ (లక్కీ డిప్) ప్రక్రియను ప్రారంభించనున్నట్లు తెలంగాణ గృహనిర్మాణ మండలి (హౌసింగ్ బోర్డు) వైస్ ఛైర్మన్ గౌతమ్ అధికారికంగా ప్రకటించారు.

ఈ డ్రా ప్రక్రియను ఏదో ఒక్క రోజుతో ముగించకుండా, ఈ నెల 27వ తేదీ నుంచి ప్రారంభించి 30వ తేదీ వరకు వరుసగా నాలుగు రోజుల పాటు నిర్వహించనున్నారు. ప్రజాప్రతినిధులు, అధికారుల సమక్షంలో నిబంధనల ప్రకారం డిప్ ప్రక్రియ కొనసాగుతుంది.

"మొత్తం 16 శాసనసభ నియోజకవర్గాల పరిధిలో నిర్మిస్తున్న 7,340 ఇళ్లకు సంబంధించి దరఖాస్తుదారుల నుంచి భారీగా స్పందన వచ్చింది. వచ్చిన దరఖాస్తులను క్షేత్రస్థాయిలో పూర్తిస్థాయిలో పరిశీలించి, అర్హులైన వారిని గుర్తించి తుది జాబితాను సిద్ధం చేశాం" అని గౌతమ్ పేర్కొన్నారు.

దరఖాస్తుదారుల సౌకర్యార్థం అర్హులైన వారి వివరాలతో కూడిన తుది జాబితాను గురువారం నుంచే అధికారిక వెబ్‌సైట్లలో అందుబాటులో ఉంచనున్నారు. లబ్ధిదారులు ts.meeseva.telangana.gov.in, tghb.cgg.gov.in, tghb.telangana.gov.in పోర్టల్స్ ద్వారా తమ పేర్లను తనిఖీ చేసుకోవచ్చు:

జాబితాలో పేర్లకు సంబంధించి లేదా అర్హతలపై ఏవైనా అభ్యంతరాలు, ఫిర్యాదులు ఉంటే దరఖాస్తుదారులు ఈ నెల 23వ తేదీ సాయంత్రం లోగా అధికారులకు తెలియజేయాల్సి ఉంటుంది. ఆ తర్వాత అభ్యంతరాలను పరిశీలించి, సవరించిన అనంతరం లాటరీ ప్రక్రియలో పాల్గొనే తుది దరఖాస్తుదారుల వివరాలను ఈ నెల 25న పూర్తిస్థాయిలో ప్రకటిస్తారు.

ఇందిరమ్మ ఇళ్ల కేటాయింపు, వెబ్‌సైట్ వివరాలు లేదా లక్కీ డిప్‌కు సంబంధించి అభ్యర్థులకు ఏవైనా సందేహాలు ఉంటే హౌసింగ్ బోర్డు ప్రత్యేకంగా ఏర్పాటు చేసిన 040-24603572 ల్యాండ్‌లైన్ నంబర్‌ను సంప్రదించి సమాచారం పొందవచ్చని అధికారులు సూచించారు.