In Pics : భోగాపురం ఎయిర్‌పోర్ట్‌లో మోదీ, చంద్రబాబు, పవన్ కళ్యాణ్.. ఫోటోలు

ఆంధ్రప్రదేశ్‌లో ఒక చారిత్రాత్మక ఘట్టం నమోదైంది. విజయనగరం జిల్లా భోగాపురంలో అత్యంత ప్రతిష్టాత్మకంగా నిర్మించిన 'అల్లూరి సీతారామరాజు అంతర్జాతీయ విమానాశ్రయాన్ని' ప్రధానమంత్రి నరేంద్ర మోదీ శనివారం (ఆగస్టు 1, 2026) వైభవంగా ప్రారంభించారు.

ఈ ప్రారంభోత్సవ కార్యక్రమంలో రాష్ట్ర గవర్నర్ ఎస్. అబ్దుల్ నజీర్, ముఖ్యమంత్రి నారా చంద్రబాబు నాయుడు, ఉప ముఖ్యమంత్రి కే. పవన్ కళ్యాణ్, కేంద్ర పౌర విమానయాన శాఖ మంత్రి కే. రామ్మోహన్ నాయుడులతో పాటు పలువురు ఉన్నతాధికారులు, ప్రముఖులు మరియు విమానాశ్రయాన్ని నిర్మించిన జీఎమ్‌ఆర్ (GMR) గ్రూప్ ప్రతినిధులు పాల్గొన్నారు.

విమానాశ్రయ టెర్మినల్ ప్రారంభం సందర్భంగా జీఎమ్‌ఆర్ గ్రూప్ ప్రతినిధులు ప్రధాని మోదీకి ఎయిర్‌పోర్ట్ నిర్మాణ విశేషాలను ప్రత్యక్షంగా వివరించారు. విమానాశ్రయంలో అందుబాటులోకి తెచ్చిన అత్యంత ఆధునిక మౌలిక వసతులు, ప్రయాణికుల సౌకర్యాలు, పర్యావరణ అనుకూల (సస్టైనబుల్) డిజైన్లను ప్రధానికి చూపించారు.

ఉత్తరాంధ్రలో పర్యాటకం, వాణిజ్యం, పెట్టుబడుల పెంపుతో పాటు ప్రాంతీయ వికాసానికి ఈ గ్రీన్ ఫీల్డ్ ఎయిర్‌పోర్ట్ ఏ విధంగా దోహదపడుతుందో సమగ్రంగా వివరించారు.

ఈ ఇంటర్నేషనల్ ఎయిర్‌పోర్ట్ అందుబాటులోకి రావడంతో ఉత్తరాంధ్ర జిల్లాలకు అంతర్జాతీయ స్థాయి ఎయిర్ కనెక్టివిటీ పెరగడమే కాకుండా, ప్రయాణికులు మరియు సరుకుల రవాణా (కార్గో) వేగవంతం కానుంది.

పబ్లిక్-ప్రైవేట్ పార్ట్‌నర్‌షిప్ (PPP) నమూనాలో సుమారు రూ.5,640 కోట్లకు పైగా వ్యయంతో ఈ గ్రీన్‌ఫీల్డ్ విమానాశ్రయాన్ని అత్యంత సుందరంగా తీర్చిదిద్దారు. ఈ నూతన అంతర్జాతీయ విమానాశ్రయం ఏడాదికి ఏకంగా 60 లక్షల మంది ప్రయాణికుల రద్దీని తట్టుకునేలా రూపొందించారు.