తిరుమలలో వైభవంగా శ్రీవారి స్వర్ణరథోత్సవం - బంగారు తేరుపై మలయప్పస్వామి దివ్య విహారం, ఫొటోలు

కలియుగ వైకుంఠమైన తిరుమల దివ్యక్షేత్రంలో శ్రీవారి నవరాత్రి బ్రహ్మోత్సవాలు అత్యంత ఆధ్యాత్మిక శోభతో, కన్నులపండువగా సాగుతున్నాయి. బ్రహ్మోత్సవాల్లో భాగంగా ఎనిమిదో రోజైన సోమవారం (అక్టోబరు 19) ఉదయం తిరుమలలో స్వర్ణరథోత్సవం కంగారు కాంతుల నడుమ అత్యంత వైభవంగా జరిగింది.

ఉదయం 7 గంటలకు శ్రీదేవి, భూదేవి సమేత శ్రీ మలయప్పస్వామివారు నిగనిగలాడే స్వర్ణకాంతులతో మెరిసిపోయే బంగారు రథంపై కొలువుదీరి, నాలుగు తిరుమాడ వీధుల్లో ఊరేగుతూ భక్తులకు దివ్యదర్శనమిచ్చారు

మంగళవాయిద్యాల దివ్యనాదాలు, వేదపండితుల మంత్రోచ్ఛారణలు, వేలాది మంది భక్తుల గోవింద నామస్మరణలతో తిరుమల గిరులు ప్రతిధ్వనించాయి. స్వామివారి స్వర్ణరథ విహారాన్ని కళ్లారా చూసిన భక్తజనం భక్తిపారవశ్యంలో మునిగితేలారు.

స్వర్ణరథోత్సవంలో ప్రధాన ఆకర్షణగా మహిళలు నిలిచారు. పెద్ద సంఖ్యలో పాల్గొన్న మహిళా భక్తులు ఎంతో భక్తిశ్రద్ధలతో, ఉత్సాహంతో స్వర్ణరథం తాళ్లను పట్టి ముందుకు లాగడం విశేషం.

బంగారు రథంపై ముచ్చటగా కొలువుదీరిన శ్రీదేవి, భూదేవి సమేత శ్రీ మలయప్పస్వామివారిని దర్శించుకునేందుకు దేశ నలుమూలల నుంచి విచ్చేసిన భక్తులు తిరుమాడ వీధుల్లో గంటల తరబడి వేచి చూశారు. స్వామివారి దివ్యమంగళ స్వరూపాన్ని దర్శించుకుంటూ మైమరిచిపోయి నమస్కరించుకున్నారు.

శ్రీవారి స్వర్ణరథోత్సవాన్ని దర్శించుకోవడం వెనుక గొప్ప ఆధ్యాత్మిక అంతరార్థం ఉంది. స్వర్ణరథంపై ఊరేగే లక్ష్మీ సమేతుడైన శ్రీవారిని దర్శించుకోవడం వల్ల ఐశ్వర్యదాత్రి అయిన శ్రీ మహాలక్ష్మీదేవి కటాక్షంతో సమస్త సంపదలు, భోగభాగ్యాలు లభిస్తాయని క్షేత్ర ప్రాశస్త్యం చెబుతోంది.

అలాగే భూదేవి అనుగ్రహంతో ధాన్యసంపదలు, వేంకటాద్రీశుని కృపతో జీవితంలో సుఖసంతోషాలు, ఐశ్వర్యం, సకల శుభాలు కలుగుతాయని భక్తుల ప్రగాఢ విశ్వాసం. స్వర్ణరథంపై స్వామివారి ఈ అలభ్య దర్శనం భక్తులకు అపరిమితమైన ఆధ్యాత్మిక ఆనందాన్ని, దైవానుగ్రహంపై అచంచలమైన విశ్వాసాన్ని కలిగించింది.

ఈ పవిత్ర కార్యక్రమంలో తిరుమల శ్రీశ్రీశ్రీ పెద్దజీయర్ స్వామి, శ్రీశ్రీశ్రీ చిన్నజీయర్ స్వామివార్లు పాల్గొని ఆధ్యాత్మిక కైంకర్యాలను పర్యవేక్షించారు.భక్తులకు ఎలాంటి ఇబ్బందులు కలగకుండా టీటీడీ విస్తృత ఏర్పాట్లు చేసింది. ఈ కార్యక్రమంలో భారీగా భక్తులు పాల్గొన్నారు.