Lifestyle changes : ఎక్కువ కాలం బతకడానికి పర్ఫెక్ట్​ లైఫ్​స్టైల్​ అవసరం లేదు! ఈ 3 చేస్తే చాలు..

కేవలం మూడు ప్రాథమిక అలవాట్లలో స్వల్ప మార్పులు చేసుకోవడం ద్వారా మన ‘ఆరోగ్యవంతమైన జీవన కాలాన్ని’ ఏకంగా 9 ఏళ్ల వరకు పెంచుకోవచ్చని డాక్టర్ సుధీర్ వివరించారు. ఇక్కడ ఆరోగ్యవంతమైన జీవన కాలం అంటే.. క్యాన్సర్, గుండె జబ్బులు, మధుమేహం, డిమెన్షియా వంటి దీర్ఘకాలిక వ్యాధులు లేని జీవితం అని అర్థం.

నిద్ర :- శరీరానికి విశ్రాంతి ఎంత అవసరమో అందరికీ తెలిసిందే. కానీ, రోజూ నిద్రపోయే సమయానికి అదనంగా కేవలం ఒక 24 నిమిషాలు కేటాయిస్తే అది అద్భుతాలు చేస్తుందని డాక్టర్ పేర్కొన్నారు. అవసరమైతే ఉదయం పూట మరో ఐదు నిమిషాలు అదనంగా పడుకోవడం కూడా ఆరోగ్యానికి మేలు చేస్తుందని వివరించారు. మనం నిద్రపోతున్నప్పుడే మెదడు, శరీరం తమను తాము రిపేర్ చేసుకుంటాయి. అందుకే సరైన నిద్ర లేకపోతే మెదడు పనితీరు మందగిస్తుంది.

వ్యాయామం :- చాలామంది వ్యాయామం అంటే గంటల తరబడి జిమ్‌లో కష్టపడాలని భయపడతారు. కానీ, డాక్టర్ సుధీర్ లెక్కల ప్రకారం.. రోజుకు కేవలం 3.7 నిమిషాల పాటు మధ్యస్థం నుంచి తీవ్రమైన శారీరక శ్రమ చేసినా ఫలితం ఉంటుంది. అది యోగా, ఈత, రన్నింగ్ లేదా వెయిట్ లిఫ్టింగ్.. ఏదైనా కావచ్చు. స్థిరంగా ప్రతిరోజూ కొద్దిసేపు కదలడం వల్ల రక్త ప్రసరణ మెరుగుపడి అవయవాలు చురుగ్గా పనిచేస్తాయి.

ఆహారం :- ఆహారం విషయంలో కూడా అతిగా ఆలోచించాల్సిన అవసరం లేదు. కేవలం కూరగాయలు, ప్రొటీన్లు ఎక్కువగా ఉండేలా చూసుకుంటే చాలు. ఆహార నాణ్యతను కొంచెం మెరుగుపరచడం వల్ల శరీరంలోని ప్రతి అవయవం సమర్థవంతంగా పనిచేస్తుంది.

డాక్టర్ సుధీర్ అందించిన గణాంకాల ప్రకారం.. రోజుకు 24 నిమిషాల అదనపు నిద్ర, 3.7 నిమిషాల వ్యాయామం, ఆహారంలో చిన్న మార్పులు చేస్తే.. మీ ఆరోగ్యవంతమైన జీవిత కాలం 4 ఏళ్లు పెరుగుతుంది. ఇదే అలవాట్లను క్రమం తప్పకుండా పాటిస్తే, మీ ఆయుష్షుకు మరో 9 ఏళ్ల ఆరోగ్యవంతమైన జీవితం తోడవుతుంది. "పర్ఫెక్ట్ లైఫ్‌స్టైల్ అంటే ప్రతిదీ అతిగా చేయడం కాదు.. కనీస అలవాట్లను క్రమం తప్పకుండా పాటించడం" అని ఆయన తెలిపారు.