Skin care : 30ఏళ్లు దాటాక చర్మం పాడవుతోందా? ఈ 5 మార్పులతో మీ వయసును దాచేయండి!

వయసు ముప్పై దాటిందంటే చాలు.. చాలామందిలో తెలియని ఆందోళన మొదలవుతుంది. ముఖ్యంగా చర్మ సౌందర్యం, జుట్టు ఆరోగ్యాన్ని కాపాడుకోవడం మునుపటి కంటే చాలా కష్టంగా మారుతుంది. ముఖంపై గీతలు రావడం, చర్మం మెరుపు కోల్పోవడం, జుట్టు విపరీతంగా రాలడం వంటి మార్పులు ఈ వయసులో సాధారణంగా కనిపిస్తాయి. ఈ మార్పులన్నీ కేవలం వృద్ధాప్య లక్షణాలు మాత్రమే అనుకుంటే పొరపాటేనని మాలవిక స్పష్టం చేశారు. చాలా సందర్భాలలో మన నిద్ర, ఒత్తిడి, తీసుకునే ఆహారంలోని పోషకాలు, శరీరంలో నీటి శాతం (హైడ్రేషన్) హార్మోన్ల ఆరోగ్యంపైనే ఇవి ఆధారపడి ఉంటాయి.

వయసుతో పాటు శరీరంలో హార్మోన్లు, కొల్లాజెన్ ఉత్పత్తి తగ్గడం, పోషకాలను గ్రహించే శక్తి క్షీణించడం వల్ల చర్మం తన సాగే గుణాన్ని కోల్పోయి వదులుగా మారుతుంది. జుట్టు పలచబడిపోతుంది. శరీరంలో ఇన్ఫ్లమేషన్ (మంట/వాపులు) పెరుగుతుంది. చర్మంపై వచ్చే గాయాలు లేదా మచ్చలు తగ్గడానికి చాలా సమయం పడుతుంది. అయితే, మన రోజువారీ అలవాట్లను మార్చుకోవడం ద్వారా ఈ సమస్యలన్నింటినీ నియంత్రించవచ్చనే మంచి వార్తను కూడా ఆమె చెప్పారు.

ప్రొటీన్- శరీరాన్ని లోపలి నుంచి బలోపేతం చేయడానికి ప్రొటీన్ ఎంతగానో తోడ్పడుతుంది. “మన చర్మం, జుట్టు అనేవి కొల్లాజెన్, కెరాటిన్ వంటి ప్రొటీన్ నిర్మాణాలతోనే తయారవుతాయి,” అని మాలవిక పేర్కొన్నారు. మనం తీసుకునే ఆహారంలో తగినంత ప్రొటీన్ లేకపోతే.. జుట్టు బలహీనంగా మారి ఊడిపోతుంది. చర్మం త్వరగా కోలుకోదు. శరీరంలో కొల్లాజెన్ ఉత్పత్తి పడిపోతుంది. అందుకే ప్రతిరోజూ తీసుకునే డైట్‌లో గుడ్లు, గ్రీక్ యోగర్ట్ లేదా గట్టి పెరుగు, పనీర్ లేదా తోఫు, పప్పుధాన్యాలు, శనగలను చేర్చుకోవాలని ఆమె సూచించారు.

ఒమేగా-3 ఫ్యాటీ యాసిడ్స్- శరీరంలో కొల్లాజెన్‌ను దెబ్బతీసే, హెయిర్ ఫాలీకల్స్‌ను బలహీనపరిచే ఇన్​ఫ్లమేషన్‌ను తగ్గించడంలో ఒమేగా-3 ఫ్యాటీ యాసిడ్స్ అద్భుతంగా పనిచేస్తాయి. ఇవి శరీరంలో వాపులను శాంతింపజేస్తాయి. తల ఉపరితలం ఆరోగ్యాన్ని కాపాడతాయి. చర్మానికి రక్షణ పొరలా పనిచేసి మెరుపును ఇస్తాయి. వీటి కోసం ప్రతిరోజూ ఉదయం పూట లేదా భోజనంతో పాటు అవిసె గింజలు, చియా సీడ్స్, వాల్‌నట్స్‌ను తీసుకోవాలని మాలవిక సలహా ఇచ్చారు. వైద్యుడిని సంప్రదించి సప్లిమెంట్స్ కూడా తీసుకోవచ్చు.

విటమిన్ సీ : విటమిన్ సీ శరీరంలో కొల్లాజెన్ ఉత్పత్తిని వేగవంతం చేస్తుంది. ఇది చర్మాన్ని బిగుతుగా ఉంచడమే కాకుండా జుట్టు నిర్మాణాన్ని ఆరోగ్యంగా ఉంచుతుంది. ఇది కొల్లాజెన్ ఉత్పత్తిని పెంచుతుంది. ఫ్రీ రాడికల్స్ వల్ల కణాలు దెబ్బతినకుండా రక్షిస్తుంది. చర్మానికి, జుట్టుకు సహజమైన కాంతిని ఇస్తుంది. అందువల్ల మీ నిత్య జీవితంలో ఉసిరికాయ, నారింజ పండ్లు, జామకాయలు, బెల్ పెప్పర్స్ (క్యాప్సికమ్) వంటి విటమిన్ సీ పుష్కలంగా ఉండే ఆహారాలను భాగం చేసుకోవాలి.

ఐరన్, ఫోలేట్- జుట్టు ఆరోగ్యంగా పెరగడానికి ఐరన్, ఫోలేట్ చాలా అవసరం. శరీరంలో ఐరన్ లోపిస్తే జుట్టు విపరీతంగా రాలుతుంది. ఎప్పుడూ నీరసంగా, శక్తే లేనట్లు అనిపిస్తుంది. చర్మం కాంతివిహీనంగా మారుతుంది. దీనికోసం పాలకూర, బీట్‌రూట్, పప్పులు, గుమ్మడికాయ గింజలు వంటి ఐరన్ ఎక్కువగా ఉండే ఆహారాలను తినాలి. అయితే, శరీరం ఐరన్‌ను బాగా గ్రహించాలంటే వీటిని విటమిన్ సీ ఉన్న ఆహారాలతో కలిపి తీసుకోవడం మరింత మంచిదని ఆమె వివరించారు.