పాపికొండల విహారయాత్రకు మళ్లీ బ్రేక్ - టూరిజం బోట్లు బంద్!

అల్లూరి సీతారామరాజు జిల్లా పోలవరం ప్రాంతంలోని ప్రసిద్ధ పర్యాటక ప్రాంతం పాపికొండల విహారయాత్రకు మళ్లీ విఘాతం ఏర్పడింది. బంగాళాఖాతంలో ఏర్పడిన తుపాన్ ప్రభావం వల్ల నేటి(అక్టోబర్ 26, 2026) నుంచి పాపికొండలకు వెళ్లే టూరిజం బోట్ల రాకపోకలను నిలిపివేస్తున్నట్లు అధికారులు ప్రకటించారు.

పర్యాటకుల భద్రతను దృష్టిలో ఉంచుకుని మొత్తం టూరిజం బోట్ల కార్యకలాపాలను తాత్కాలికంగా నిలిపివేయాలని రంపచోడవరం సబ్ కలెక్టర్ ఉత్తర్వులు జారీ చేశారు. నదిలో అలల తాకిడి పెరిగే అవకాశం ఉండటం, ఈదురుగాలుల తీవ్రత దృష్ట్యా ఎలాంటి ప్రమాదాలు జరగకుండా ముందస్తు జాగ్రత్తగా ఈ నిర్ణయం తీసుకున్నారు.

ఇటీవలే గోదావరి నదికి భారీగా వచ్చిన వరదల కారణంగా దాదాపు 70 రోజుల పాటు పాపికొండల విహారయాత్ర పూర్తిగా నిలిచిపోయిన సంగతి తెలిసిందే. ఆ తర్వాత దసరా సెలవులను పురస్కరించుకుని, కేవలం రెండు వారాల క్రితమే అధికారులు ఈ యాత్రను పునఃప్రారంభించారు.

సుదీర్ఘ విరామం తర్వాత పర్యాటకులు ఇప్పుడిప్పుడే పాపికొండల అందాలను తిలకించేందుకు తరలివస్తున్న సమయంలో, మళ్లీ తుపాన్ రూపంలో విహారయాత్రకు విరామం పడటంతో పర్యాటకులు, స్థానిక బోటు నిర్వహకులు తీవ్ర నిరాశ వ్యక్తం చేస్తున్నారు.

వాతావరణం అనుకూలించి పరిస్థితి సాధారణ స్థితికి వచ్చాకే తిరిగి బోట్ల రాకపోకలను పునరుద్ధరిస్తామని టూరిజం యంత్రాంగం వెల్లడించింది. అప్పటివరకు రాకపోకలపై నిషేధం అమల్లో ఉంటుందని స్పష్టం చేసింది.