ఏపీ, తెలంగాణలో పిడుగులతో కూడిన వర్షాలు - ఈ జిల్లాలకు వాతావరణ శాఖ హెచ్చరికలు

తెలుగు రాష్ట్రాల్లో రాబోయే కొద్దిరోజుల పాటు వాతావరణం మారనుంది. ఆంధ్రప్రదేశ్, తెలంగాణలోని పలు ప్రాంతాల్లో ఉరుములు, మెరుపులు, ఈదురుగాలులతో కూడిన మోస్తరు వర్షాలు కురిసే సూచనలున్నాయని వాతావరణశాఖ అంచనా వేసింది.

ఆంధ్రప్రదేశ్ రాష్ట్ర విపత్తుల నిర్వహణ సంస్థ తెలిపిన వివరాల ప్రకారం.. ఆదివారం (04-10-2026) రోజున అనకాపల్లి, కాకినాడ, డాక్టర్ బి.ఆర్. అంబేడ్కర్ కోనసీమ, పశ్చిమ గోదావరి జిల్లాల్లో అక్కడక్కడ పిడుగులతో కూడిన మోస్తరు వర్షాలు కురిసే అవకాశం ఉంది.

హైదరాబాద్ వాతావరణ కేంద్రం తెలిపిన వివరాల ప్రకారం…. తెలంగాణలోని పలు జిల్లాల్లో ఉరుములు, మెరుపులతో పాటు గంటకు 30 నుంచి 40 కిలోమీటర్ల వేగంతో ఈదురుగాలులు వీచే అవకాశం ఉందని తెలిపింది.

ఇవాళ తెలంగాణలో పొడి వాతావరణం ఉండే అవకాశం ఉంది. ఇక రేపట్నుంచి మళ్లీ వర్షాలు పడే అవకాశం ఉంది. అక్టోబర్ 5న కొత్తగూడెం, ఖమ్మం, నల్గొండ, సూర్యాపేట, మహబూబాబాద్, నాగర్ కర్నూల్, వనపర్తి, నారాయణపేట, గద్వాల్ జిల్లాల్లో ఉరుములు, మెరుపులు, ఈదురుగాలులతో కూడిన వర్షం పడొచ్చు. ఈ జిల్లాలకు ఎల్లో హెచ్చరికలు జారీ అయ్యాయి.

అక్టోబర్ 6వ తేదీన కొత్తగూడెం, ఖమ్మం, నల్గొండ, సూర్యాపేట, మహబూబాబాబాద్, భువనగిరి, రంగారెడ్డ,వికారాబాద్, మహబూబ్ నగర్, నాగర్ కర్నూల్, వనపర్తి,నారాయణపేట, గద్వాల్ జిల్లాల్లో ఉరుములు, మెరుపులతో కూడిన వానలు పడొచ్చు.

అక్టోబర్ 7వ తేదీన భూపాలపల్లి, ములుగు, కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హన్మకొండ, జనగాం, సిద్ధిపేట, భువనగిరి, రంగాడెడ్డి, హైదరాబాద్, మేడ్చల్, వికారాబాద్, సంగారెడ్డి, మెదక్, కామారెడ్డి, మహబూబ్ నగర్, నాగర్ కర్నూల్, నారాయణపేట, గద్వాల జిల్లాల్లో ఉరుములు, మెరుపులు, ఈదురుగాలులతో కూడిన వర్షాలు పడే సూచనలున్నాయి.

ఉరుములు, మెరుపులు వస్తున్నప్పుడు విద్యుత్ స్తంభాలు, భారీ చెట్ల కింద నిలబడవద్దని అధికారులు సూచిస్తున్నారు. రైతులు, పశువుల కాపరులు పిడుగులు పడే సూచనలు కనిపించగానే సురక్షితమైన భవనాల్లోకి వెళ్లాలని హెచ్చరించారు.