Andhrapradesh : ప్రయాణికులకు సరికొత్త అనుభూతి - నయా లుక్ లో ‘కంభం’ రైల్వే స్టేషన్, ఫొటోలు

ఉమ్మడి ప్రకాశం జిల్లాలోని కంభం రైల్వే స్టేషన్‌ను (Cumbum Railway Station) దక్షిణ మధ్య రైల్వే (South Central Railway) రూ.11.72 కోట్ల భారీ వ్యయంతో సర్వాంగ సుందరంగా తీర్చిదిద్దింది. ఆధునిక మౌలిక సదుపాయాల కల్పనతో పాటు స్థానిక సాంస్కృతిక వైభవానికి అద్దం పట్టేలా ఈ స్టేషన్ రూపురేఖలను పూర్తిగా మార్చివేశారు.

పునర్నిర్మాణంలో భాగంగా రైల్వే స్టేషన్ ప్రధాన భవనాన్ని, దాని ముందు భాగాన్ని (Facade) ఎంతో ఆకర్షణీయంగా మార్చారు. ప్రయాణికుల రాకపోకలకు వీలుగా సర్క్యులేటింగ్ ఏరియాను విస్తరించడంతో పాటు విశాలమైన పార్కింగ్ సదుపాయాన్ని అందుబాటులోకి తెచ్చారు.

రైళ్ల కోసం వేచి ఉండే ప్రయాణికుల సౌకర్యార్థం అత్యాధునిక వెయిటింగ్ హాళ్లు, ఒక ప్లాట్‌ఫారమ్ నుండి మరో ప్లాట్‌ఫారమ్‌కు సులభంగా వెళ్లేందుకు వీలుగా ఫుట్ ఓవర్ బ్రిడ్జ్ (FOB), వృద్ధులు మరియు దివ్యాంగుల కోసం లిఫ్టుల సౌకర్యాన్ని కూడా ఏర్పాటు చేశారు. వీటితో పాటు రైల్వే ప్లాట్‌ఫారమ్‌లను మరింత పొడిగించి, వాటి ఉపరితలాన్ని (Surface) ప్రయాణికులకు అనుకూలంగా ఆధునికీకరించారు.

ఈ ఆధునికీకరణలో అత్యంత ప్రధాన ఆకర్షణగా నిలిచింది స్టేషన్ ముఖద్వారం వద్ద ఏర్పాటు చేసిన ఒంగోలు జాతి ఎద్దుల ప్రతిమలు. ప్రపంచ ప్రఖ్యాతి గాంచిన, ప్రకాశం జిల్లా గర్వకారణమైన రెండు ఒంగోలు జాతి ఎద్దుల నిలువెత్తు విగ్రహాలను స్టేషన్ ఎదుట అత్యంత కళాత్మకంగా తీర్చిదిద్దారు. ఇవి చూసేందుకు అచ్చం నిజమైన ఎద్దుల్లాగే భ్రమింపజేస్తూ, రాజసం ఉట్టిపడేలా కనిపిస్తున్నాయి.

కంభం మరియు దాని పరిసర ప్రాంతాల్లో వ్యవసాయంపై ఆధారపడి జీవించే రైతులు ఎక్కువగా ఉంటారని, అందుకే ఈ ప్రాంత ప్రాధాన్యతను, రైతుల శ్రమను గౌరవిస్తూ ఈ ఒంగోలు గిత్తల ప్రతిమలను ప్రత్యేకంగా రూపొందించినట్లు రైల్వే అధికారులు వెల్లడించారు.

రాత్రి వేళల్లో సరికొత్త విద్యుద్దీపాల అలంకరణతో (Lighting) ఈ రైల్వే స్టేషన్ సరికొత్త కాంతులీనుతూ, ప్రయాణికులకు కనువిందు చేస్తోంది. ఈ ఆధునిక మార్పుల పట్ల స్థానిక ప్రజలు, ప్రయాణికులు హర్షం వ్యక్తం చేస్తున్నారు.