కోనసీమ మత్స్యకారులకు అండగా రిలయన్స్ ఫౌండేషన్ - పడవల పునరుద్ధరణకు సహాయక చర్యలు ప్రారంభం

'అర్నవ్ ' తుఫాను ఆంధ్రప్రదేశ్ తూర్పు తీరప్రాంతాల్లో తీవ్ర విధ్వంసాన్ని మిగిల్చింది. ప్రధానంగా డాక్టర్ బి.ఆర్. అంబేడ్కర్ కోనసీమ జిల్లాలోని మత్స్యకార సముదాయాల జీవనోపాధిపై ఈ తుఫాను దెబ్బకొట్టింది. వేలాది కుటుంబాలు తమ దైనందిన జీవితాన్ని కోల్పోయి తీవ్ర సంక్షోభంలో కూరుకుపోయాయి. ఈ కష్ట సమయంలో బాధిత కుటుంబాలకు చేయూతనందించేందుకు రిలయన్స్ ఫౌండేషన్ తక్షణమే రంగానికి దిగింది. తుఫాను ధాటికి కొట్టుకుపోయిన, మునిగిపోయిన మత్స్యకారుల యాంత్రిక పడవలను తిరిగి వెలికితీసి, వారి జీవనోపాధిని పునరుద్ధరించేందుకు బృహత్తర కార్యక్రమాన్ని ప్రారంభించింది.

కోనసీమ జిల్లా అల్లావరం మండలంలోని ఓడలరేవు, సఖినేటిపల్లి ఫిషింగ్ ల్యాండింగ్ కేంద్రాల్లో తుఫాను ప్రభావంతో…. లంగరు వేసిన స్థానాల నుండి దాదాపు 186 చేపల వేట పడవలు కొట్టుకుపోయాయి. సుమారు 5 నుండి 10 టన్నుల బరువున్న ఈ పడవలు సమీపంలోని కాలువలు, బురద ప్రాంతాలు, ఒండ్రు దిబ్బలలో చిక్కుకుపోయాయి. కొన్ని పడవలు ఒకదానిపై ఒకటి పడిపోగా, మరికొన్ని పాక్షికంగా లేదా పూర్తిగా మునిగిపోయాయి.రహదారులు సరిగ్గా లేని, దట్టమైన బురద పేరుకుపోయిన ప్రమాదకర ప్రాంతాలలో పడవలు ఇరుక్కుపోవడంతో, వాటిని చేతులతో లేదా సాధారణ పద్ధతుల్లో వెలికితీయడం అసాధ్యంగా మారింది. రోజులు గడిచేకొద్దీ నీటిలోనే ఉన్న పడవలు మరింత దెబ్బతినే ప్రమాదం ఏర్పడింది.

క్షేత్రస్థాయిలో పరిస్థితి తీవ్రతను గుర్తించిన రిలయన్స్ ఫౌండేషన్ బృందాలు…. సంస్థ యొక్క "వి కేర్" (We Care) సామాజిక బాధ్యత సూత్రానికి అనుగుణంగా తక్షణమే స్పందించాయి. అల్లావరం మండల మత్స్యశాఖ, స్థానిక ప్రభుత్వ అధికారులతో సమన్వయం చేసుకుని భారీ యంత్రాల సహాయంతో వెలికితీత చర్యలను ప్లాన్ చేశాయి.

ప్రత్యేక క్రేన్లు, యాంత్రిక పరికరాలను రప్పించి, ప్రమాదకర పరిస్థితుల్లో ఇరుక్కుపోయిన పడవలను సురక్షిత ప్రాంతాలకు చేర్చే పనిని ప్రారంభించారు. స్థానిక మత్స్యకారులతో కలిసి ప్రతి పడవ లొకేషన్‌ను క్షుణ్ణంగా నిర్ధారించుకుంటూ, నిపుణులైన క్రేన్ ఆపరేటర్ల పర్యవేక్షణలో అత్యంత జాగ్రత్తగా ఈ ప్రక్రియను నిర్వహిస్తున్నారు.

ఈ పునరుద్ధరణ చర్య ద్వారా ఈ ప్రాంతంలోని సుమారు 10,000 మంది మత్స్యకారులు నేరుగా, పరోక్షంగా ప్రయోజనం పొందనున్నారు. పడవలు నీటిలోనే ఉండిపోవడం వల్ల జరిగే అదనపు ఆర్థిక నష్టాన్ని ఈ చర్య నిరోధిస్తుంది. సురక్షితంగా బయటకు తీసిన పడవల మరమ్మతు అంచనాలను త్వరితగతిన పూర్తి చేసుకుని, మరమ్మతులు ముగిసిన వెంటనే మత్స్యకార కుటుంబాలు మళ్లీ వేటకు వెళ్లేలా రిలయన్స్ ఫౌండేషన్ బాటలు వేస్తోందని ఆ సంస్థ ప్రతినిధులు తెలిపారు.