సౌతాఫ్రికాపై టీమిండియా ఆధిపత్యం.. మహిళల ప్రపంచ కప్​లో భారత్​ గెలుపు ఖాయమేనా!

ఈ 2025 మహిళల ప్రపంచకప్​లో నవీ ముంబై వేదికగా టీమిండియా ఇప్పటికే 3 మ్యాచ్​లు ఆడింది. అంతేకాదు, అన్ని మ్యాచుల్లోనూ గెలిచింది! అంటే గ్రౌండ్​ పరిస్థితులు మన మహిళల జట్టుకు బాగా తెలుసు. పైగా వర్షాల కారణంగా ప్రాక్టీస్​ సెషన్​లు కూడా సరిగ్గా జరగలేదు. ఫలితంగా గ్రౌండ్​ పరిస్థితులకు సౌతాఫ్రికా జట్టు అలవాటు పడిందా లేదా చూడాలి.

వన్డేల్లో సౌతాఫ్రికాతో హెడ్​-టు-హెడ్​ స్టాట్స్​ విషయంలో టీమిండియా మెరుగైన స్థితిలో ఉంది. 34 సందర్భాల్లో ఇరు జట్లు తలపడగా భారత మహిళల టీమ్​ 20 సార్లు గెలిచింది. సౌతాఫ్రికా 13 సార్లు విజయం సాధించింది. 2025 మహిళల వన్డే ప్రపంచకప్​లో ఇది మనకు అడ్వాంటేజ్​!

భారత మహిళల జట్టు సారథి హర్మన్​ప్రీత్​ కౌర్​ ఫామ్​లోకి రావడం మరొక ప్లస్​ పాయింట్​! ఆస్ట్రేలియాతో జరిగిన సెమీ ఫైనల్​లో హర్మన్​ప్రీత్​ 89 పరుగలు చేసింది. జెమిమాతో కలిసి సాధించిన 167 పరుగుల చారిత్రక భాగస్వామ్యంతో హర్మన్​ప్రీత్​లో విశ్వాసం మరింత పెరిగి ఉంటుంది. అంతేకాదు, 36ఏళ్ల హర్మన్​ప్రీత్​కు ఇదే చివరి వరల్డ్​ కప్​ అవ్వొచ్చు. అందుకే ఇందులో మెరుగైన ప్రదర్శన చేసేందుకు ఆమె రెడీ అవ్వనుంది.

మహిళల ప్రపంచకప్​ ఆశాంతం టీమిండియా బ్యాటింగ్​ లైనప్​లో నెం.3 ఇబ్బంది పెట్టింది. కానీ జెమిమా కారణంగా ఆస్ట్రేలియాతో జరిగిన సెమీ ఫైనల్​లో ఆ ఇబ్బంది కూడా తొలగిపోయింది. ఇది కూడా సానుకూల విషయమే.

వీటన్నింటికి మించిన ప్లస్​ పాయింట్​.. మన మహిళల జట్టుకు దేశవ్యాప్తంగా భారీ మద్దతు లభిస్తుండటం. డీవై పాటిల్​ వేదికగా జరగనున్న ఫైనల్​ మ్యాచ్​ టికెట్లు ఇప్పటికే అమ్ముడుపోయాయి. ప్రజలు మన జట్టుకు ఫుల్​ ఎనర్జీని ఇచ్చే పనిలో ఉండటం ఖాయం!