Summer Skin Care : వేసవిలో స్కిన్ టానింగ్ అవ్వకుండా డాక్టర్ చెబుతున్న 3 చిట్కాలు

వేసవి వచ్చినప్పుడు మీ చర్మం కూడా రంగు మారుతుందా? ఈ వేసవిలో టాన్‌ అవ్వకుండా ఉండాలనుకుంటున్నారా? అయితే చర్మవ్యాధి నిపుణురాలు డాక్టర్ శ్వేతా రాహుల్ తన సోషల్ మీడియా పేజీలో పేర్కొన్న ఈ 3 విషయాలను పాటించండి. దీనితో మీరు వేసవిలో కూడా మీ చర్మం రంగు మారకుండా అందంగా మెరిసిపోవచ్చు.

వేసవి ఎండ కారణంగా చర్మం రంగు మారకుండా ఉండాలంటే.. ఎస్పీఎఫ్ 50 ఉన్న సన్‌స్క్రీన్‌ను వాడాలి. అందులో జింక్ ఆక్సైడ్, టైటానియం డయాక్సైడ్ కూడా ఉండాలి. ఈ సన్‌స్క్రీన్ లోషన్‌ను బయటకు వెళ్లే 20 నిమిషాల ముందు చర్మానికి రాసుకోవాలి. అలాగే మీరు ఎక్కువ సేపు బయట ఉండబోతున్నట్లయితే, ప్రతి 3 గంటలకు ఒకసారి సన్‌స్క్రీన్‌ను మళ్లీ రాసుకోవాలి.

వేసవిలో మనం వేసుకునే దుస్తుల విషయంలో శ్రద్ధ వహించాలి. తేలికైన కాటన్ లేదా లినెన్ దుస్తులను ఎంచుకుని ధరించాలి. ప్రధానంగా లేత రంగు దుస్తులు వేసుకోవాలి. అంతేకాకుండా చర్మానికి రక్షణ కల్పించేందుకు ఈ దుస్తులు శరీరం మొత్తాన్ని కప్పి ఉంచాలి.

లోపలి నుండి రక్షణ పొందాలంటే.. శక్తివంతమైన యాంటీఆక్సిడెంట్ అయిన లైకోపీన్ అధికంగా ఉండే ఆహారాలను తీసుకోవాలి. లైకోపీన్ నోటి ద్వారా తీసుకునే సన్‌స్క్రీన్ లాంటిదని డాక్టర్ చెబుతున్నారు. టమోటాలు, పుచ్చకాయలలో లైకోపీన్ పుష్కలంగా ఉంటుంది. అందువల్ల మీరు మీ ఆహారంలో ఈ రకమైన ఆహారాలను ఎక్కువగా చేర్చుకోవాలి. విటమిన్ సి అధికంగా ఉండే ఆహారాలను కూడా తీసుకోవాలి. ఇవి శరీరాన్ని లోపలి నుండి రక్షిస్తాయి.