తెలంగాణలో హ్యామ్ రోడ్ల నిర్మాణాలకు ప్రతిపాదనలు పంపండి.. నోటిఫికేషన్ విడుదల!

తెలంగాణలోని గ్రామీణ ప్రాంతాల్లో హ్యామ్ రోడ్ల నిర్మాణానికి ప్రతిపాదనలను ఆహ్వానిస్తూ.. పంచాయతీ రాజ్ ఇంజినీరింగ్ విభాగం నోటిఫికేషన్ జారీ చేసింది. ఈ మేరకు నిర్మాణ సంస్థలు ప్రతిపాదనలు పంపాలి.

30 నెలల్లో రోడ్లు నిర్మించి 15 సంవత్సరాలు నిర్వహించాలని నోటిఫికేషన్‌లో ప్రభుత్వం స్పష్టంగా పేర్కొంది. మెుదటి విడతలో రూ.6294 కోట్ల ఖర్చుతో నిర్మాణం చేపట్టనున్నారు. 17 ప్యాకేజీల్లో 7449 కిలోమీటర్ల రోడ్లను పంచాయతీ రాజ్ శాఖ నిర్మించనుంది.

హ్యామ్ రోడ్లకు ఆమోదం తెలిపిన మంత్రి మండలి..మొత్తం 32 ప్యాకేజీలుగా టెండర్లకు వెళ్లాలని నిర్ణయించిన విషయం తెలిసిందే. వారం గడువు చొప్పున అన్ని ప్యాకేజీలకు టెండర్లను పిలిచి, పనులను ముందుకు తీసుకెళ్లాలని ప్రభుత్వం భావిస్తోంది.

మొత్తం 400 రహదారులకు 5,566.15 కిలోమీటర్ల మేర రూ.10,547.38 కోట్లతో అభివృద్ధి చేయాలని మంత్రివర్గం నిర్ణయం తీసుకున్నది. ప్రభుత్వం ఈ హ్యామ్​ రోడ్ల నిర్మాణంపై ఫోకస్ ఎక్కువగా పెడుతుంది. వీటి ద్వారా జాతీయ రహదారులతో మండలాలకు కనెక్టవిటీ పెరుగుతుంది.