చౌకైన ఆటోమేటిక్​ ఎస్​యూవీలు ఇవి.. ధర రూ. 8.20లక్షల కన్నా తక్కువే!

రూ. 6.21 లక్షల ఎక్స్​షోరూం ధరకు భారతదేశంలో లభిస్తున్న అత్యంత చవకైన ఆటోమేటిక్ ఎస్‌యూవీ ఈ నిస్సాన్​ మాగ్నైట్​. రెనాల్ట్ కైగర్​లాగే ఇందులోనూ ఇంజన్ ఫీచర్లు ఉన్నప్పటికీ, ధర విషయంలో మాగ్నైట్ మరింత ఆకర్షణీయంగా ఉంటుంది. దేశంలో అతి తక్కువ ధరకే లభించే సీవీటీ కారు ఇది. ఆల్-బ్లాక్ లుక్ ఇష్టపడేవారి కోసం ఇందులో 'కురో' ఎడిషన్ కూడా అందుబాటులో ఉంది.

రూ. 6.95 లక్షల ఎక్స్​షోరూం ధర వద్ద టాటా పంచ్, హ్యుందాయ్ ఎక్స్​టర్​ కంటే రెనాల్ట్​ కైగర్​ కాస్త పెద్దదిగా, విశాలంగా ఉంటుంది. ఇందులో రెండు రకాల ఆటోమేటిక్ ఆప్షన్లు ఉన్నాయి. 1.0 లీటర్ పెట్రోల్ ఇంజన్‌కు 5-స్పీడ్ ఏఎంటీ, టర్బో-పెట్రోల్ ఇంజన్‌కు స్మూత్ సీవీటీ గేర్‌బాక్స్ లభిస్తాయి. 8 ఇంచ్​ టచ్‌స్క్రీన్, వైర్‌లెస్ ఛార్జర్, 360-డిగ్రీ కెమెరా, 6 ఎయిర్‌బ్యాగులు దీని సొంతం.

సేఫ్టీకి మారుపేరుగా నిలిచే టాటా పంచ్ ఏఎంటీ వెర్షన్ మొత్తం రూ. 10 లక్షల బడ్జెట్‌లోనే లభిస్తుంది. దీని ప్రారంభ ఎక్స్​షోరూం ధర రూ. 7.55 లక్షల నుంచి ఉంది. ఇందులో 1.2 లీటర్ 3-సిలిండర్ పెట్రోల్ ఇంజన్, 5-స్పీడ్ ఏఎంటీతో వస్తుంది. 10.25 ఇంచ్​ పెద్ద టచ్‌స్క్రీన్, 16 ఇంచ్​ అలాయ్ వీల్స్, సన్‌రూఫ్, ఆటోమేటిక్ హెడ్‌ల్యాంప్స్ దీని ప్రధాన ఆకర్షణలు.

రూ. 7.68 లక్షల (ఎక్స్​షోరూం) వద్ద చిన్న కారే అయినప్పటికీ, ఫీచర్ల విషయంలో హ్యుందాయ్​ ఎక్స్​టర్​ రాజీ పడదు. ఇది 1.2 లీటర్ 4-సిలిండర్ పెట్రోల్ ఇంజన్‌తో వస్తుంది. దీని ఏఎంటీ వెర్షన్ లీటరుకు 19.2 కిమీ మైలేజీని ఇస్తుందని కంపెనీ పేర్కొంది. ఈ ధరలో గేర్లను మాన్యువల్‌గా కంట్రోల్ చేయడానికి ప్యాడిల్ షిఫ్టర్స్ అందించడం విశేషం. నైట్ ఎడిషన్‌లో ఇది మరింత స్టైలిష్‌గా ఉంటుంది.

మారుతీ సుజుకీ ఫ్రాంక్స్​ ఆటోమేటిక్​ వేరియంట్​ ప్రారంభ ఎక్స్​షోరూం రూ. 8.15 లక్షలు. డెల్టా, డెల్టా+ వేరియంట్లు రూ. 10 లక్షల లోపు ఏఎంటీ గేర్‌బాక్స్‌తో వస్తాయి. మీరు పవర్ ఫుల్ డ్రైవ్ కోరుకుంటే, ఇందులోని 1.0 లీటర్ టర్బో-పెట్రోల్ ఇంజన్ ఆప్షన్‌ను కూడా ఎంచుకోవచ్చు.