Heart attack : గుండెపోటు ఎలా వస్తుంది? అసలు కారణాలు..

గుండెపోటు అనగానే మనకు వెంటనే గుర్తుకువచ్చేది గుండె లోపలి భాగంలో ఏదో పెద్ద ప్రమాదం జరిగిందనే భావన. చాలామందిలో ఇప్పటికీ ఇదే విధమైన అపోహ ఉంది. అయితే అసలు గుండెపోటు అనేది గుండె లోపల కాకుండా, దాని వెలుపలి ఉపరితలంపై ఉండే రక్తనాళాల్లో సంభవిస్తుందని ప్రముఖ కార్డియోవాస్కులర్ సర్జన్ డాక్టర్ జెరెమీ లండన్ స్పష్టం చేశారు. అమెరికాలోని జార్జియా మెడికల్ కాలేజ్ నుంచి ఎండీ పట్టా పొంది, 25 ఏళ్లకు పైగా హృద్రోగ శస్త్రచికిత్స నిపుణుడిగా సేవలు అందిస్తున్న డాక్టర్ జెరెమీ లండన్ సోషల్ మీడియా వేదికగా.. గుండెపోటు వెనుక ఉన్న అసలు నిజాలను పంచుకున్నారు.

"గుండె అనేది మన శరీరమంతటికీ రక్తాన్ని సరఫరా చేసే ఒక పంప్ లాంటిది. ఆ పంప్ నిరంతరం పనిచేయడానికి దానికి ప్రత్యేకంగా ఆక్సిజన్, పోషకాలు అవసరం. గుండె కండరానికి ఈ ఇంధనాన్ని అందించే బాధ్యతను ప్రధానంగా మూడు రక్తనాళాలు (ధమనులు) పంచుకుంటాయి. ఇవి గుండె ముందు భాగం, పక్క భాగం, వెనుక లేదా కింది భాగంలో అమరి ఉంటాయి," అని డాక్టర్ జెరెమీ లండన్ వివరించారు.

ఈ రక్తనాళాల అమరికలో ఒక అద్భుతమైన సహజ వ్యవస్థ ఉందని డాక్టర్ తెలిపారు. గుండె ముందు వైపు, వెనుక వైపు ఉండే రక్తనాళాలు ఒకదానికొకటి అనుసంధానమై ఉంటాయి. వీటిని ‘సిస్టర్ ఆర్టరీస్’ అని పిలుస్తారు. ఒకవేళ వీటిలో ఒక రక్తనాళంలో అడ్డంకి (బ్లాకేజ్) నెమ్మదిగా ఏర్పడితే, రెండో రక్తనాళం ఆ భాగానికి రక్తాన్ని అందించేందుకు సహాయపడుతుంది. ఇది గుండెకు ప్రకృతి ఇచ్చిన ఒక గొప్ప రక్షణ కవచం.

రక్తనాళాల్లో అడ్డంకులు నెమ్మదిగా కాకుండా హఠాత్తుగా ఏర్పడినప్పుడే అసలు ప్రమాదం ఎదురవుతుంది. "గుండెపోటు ప్రధానంగా రక్తనాళాల గోడల్లో పేరుకుపోయిన కొవ్వు (ప్లాక్) హఠాత్తుగా పగలడం వల్ల వస్తుంది. ఆ ప్లాక్ పగిలిన వెంటనే అక్కడ రక్తం గడ్డకట్టి (క్లాట్), గుండె ఉపరితలంపై ఉన్న రక్తనాళంలో ప్రవాహాన్ని పూర్తిగా అడ్డుకుంటుంది. దీనివల్ల ఆ రక్తనాళం కింద ఉన్న గుండె కండరానికి ఆక్సిజన్, పోషకాలు అందవు. ఆ కండరం ఊపిరి ఆడక నశిస్తున్న సమయంలోనే తీవ్రమైన ఛాతీ నొప్పి వస్తుంది. దాన్నే మనం గుండెపోటు అంటాం," అని డాక్టర్ లండన్ చెప్పారు.

గుండెపోటు వచ్చినప్పుడు లేదా రక్తనాళాల్లో తీవ్రమైన అడ్డంకులు ఏర్పడినప్పుడు వైద్యులు రెండు ప్రధాన పద్ధతుల్లో రక్తాన్ని పునరుద్ధరిస్తారు. అవి..

స్టెంట్ అమర్చడం: మూసుకుపోయిన రక్తనాళం లోపలికి చిన్న స్టెంట్‌ను పంపి, నాళాన్ని వెడల్పు చేసి రక్త ప్రవాహాన్ని పునరుద్ధరిస్తారు.

బైపాస్ సర్జరీ: గుండె ఉపరితలంపై ఉన్న రక్తనాళం పూర్తిగా మూసుకుపోతే, వేరే ప్రాంతం నుంచి తీసిన రక్తనాళం సహాయంతో ఆ అడ్డంకిని దాటుకుని రక్తం ప్రవహించేలా ప్రత్యామ్నాయ మార్గాన్ని బైపాస్ చేస్తారు.