Vitamin B12 : విటమిన్ బీ12 టాబ్లెట్లు ఎప్పుడు వేసుకోవాలి? ఇవి తెలుసుకోండి..

మానవ శరీరంలో కీలక విధులు నిర్వహించడానికి విటమిన్ బీ12 ఎంతో కీలకం. ఇది నరాల కణాల పనితీరును మెరుగుపరచడమే కాకుండా, రక్తహీనత రాకుండా ఎర్ర రక్త కణాల తయారీలో సహాయపడుతుంది. సాధారణంగా మాంసం, గుడ్లు, పాల పదార్థాలు తినే వారికి ఇది ఆహారం ద్వారా అందుతుంది. కానీ శాకాహారులు, వృద్ధులు, జీర్ణక్రియ సమస్యలు ఉన్నవారిలో బీ12 లోపం ఎక్కువగా కనిపిస్తుంది. దీని లోపం వల్ల తీవ్రమైన అలసట, జ్ఞాపకశక్తి తగ్గడం, నరాల బలహీనత వంటి సమస్యలు వస్తాయి. ఒకవేళ మీరు విటమిన్ బీ12 సప్లిమెంట్లు లేదా టాబ్లెట్లు వాడుతుంటే.. అవి శరీరానికి పూర్తిగా అబ్బడానికి సరైన సమయంలో తీసుకోవడం చాలా ముఖ్యం.

విటమిన్ బీ12 అనేది నీటిలో సులభంగా కరిగిపోయే పోషకం. ఆహారంలోని ఇతర పోషకాలతో పోటీ లేకుండా శరీరం దీనిని వేగంగా గ్రహించాలంటే.. ఉదయం పూట ఖాళీ కడుపుతో, అల్పాహారానికి కనీసం 30 నిమిషాల ముందు ఒక గ్లాసు నిండుగా నీటితో తీసుకోవడం అత్యంత ఉత్తమమైన పద్ధతి. అంతేకాకుండా, విటమిన్ బీ12 శరీరంలో సెల్యులార్ ఎనర్జీ (శక్తి) ని ఉత్పత్తి చేయడంలో నేరుగా పాల్గొంటుంది. అందువల్ల, దీనిని ఉదయాన్నే తీసుకోవడం ద్వారా రోజంతా సహజసిద్ధమైన ఎనర్జీ లభిస్తుంది. ఒకవేళ రాత్రి పూట తీసుకుంటే.. ఇది నిద్రకు భంగం కలిగించే అవకాశం ఉంది. అయితే, మీరు బీ12ని విడిగా కాకుండా ఇతర మల్టీవిటమిన్ టాబ్లెట్లతో కలిపి తీసుకుంటుంటే, వైద్యుల సలహా మేరకు సాధారణ సమయంలోనే వేసుకోవచ్చు.

హై-డోస్ విటమిన్ సీ సప్లిమెంట్లను విటమిన్ బీ12తో కలిపి తీసుకోకూడదు. ఎందుకంటే విటమిన్ సీ అనేది జీర్ణవ్యవస్థలో బీ12 విటమిన్‌ను విచ్ఛిన్నం చేసి, దాని ప్రభావాన్ని తగ్గిస్తుంది. కాబట్టి ఈ రెండింటికీ మధ్య కనీసం రెండు గంటల గ్యాప్ ఉండేలా చూసుకోవాలి.

విటమిన్ బి12 టాబ్లెట్ వేసుకున్న తర్వాత కనీసం 30 నిమిషాల వరకు కాఫీ లేదా టీ తాగకూడదు. కెఫిన్, వేడి పానీయాలు కడుపులోని ఆమ్ల గుణాన్ని (ఎసిడిటీ) మార్చడమే కాకుండా, జీర్ణక్రియ ప్రక్రియను వేగవంతం చేస్తాయి. దీనివల్ల శరీరం బీ12ని పూర్తిగా గ్రహించలేదు.

బీ12 సప్లిమెంట్లను క్యాల్షియం ఎక్కువగా ఉండే పాల పదార్థాలు లేదా క్యాల్షియం టాబ్లెట్లతో కలిపి తీసుకోకూడదు. ఎక్కువ మోతాదులో ఉండే క్యాల్షియం.. ప్రేగుల్లో విటమిన్ బీ12 శోషణ మార్గాలను అడ్డుకుంటుంది!

మనం వాడే కొన్ని రకాల ఇతర మందులు శరీరంలో విటమిన్ బీ12 అబ్సార్ప్​షన్​ని తగ్గిస్తాయి. కాబట్టి మీరు క్రమం తప్పకుండా మందులు వాడుతుంటే, బీ12 టాబ్లెట్ ఏ సమయంలో వేసుకోవాలో డాక్టర్‌ను అడిగి తెలుసుకోవడం మంచిది.