Weight loss : సులభంగా బరువు తగ్గడం ఎలా? 20 కేజీలు తగ్గిన మహిళ చెబుతున్న సింపుల్ టిప్స్..

బరువు తగ్గే ప్రయాణం ప్రతి ఒక్కరికీ భిన్నంగా ఉంటుంది. ఒకరికి పనిచేసే విధానం మరొకరికి పనిచేయాలని లేదు. అయితే శాశ్వతమైన మార్పులు రావాలంటే మనం సులభంగా పాటించగలిగే ఆరోగ్యకరమైన అలవాట్లను అలవర్చుకోవాలి. తాను కోల్పోయిన 20 కిలోల బరువు మళ్లీ పెరిగితే, మొదటి నుంచి ఆ బరువును తగ్గించుకోవడానికి తాను ఏయే పద్ధతులు పాటిస్తానో శవానీ గోయల్ అనే మహిళ తన ఇన్‌స్టాగ్రామ్ వీడియోలో పంచుకున్నారు. బరువు తగ్గాలనుకునే వారికి ఆమె కొన్ని చక్కని సలహాలు ఇచ్చారు.

వాకింగ్- బరువు తగ్గడానికి రోజుకు 10,000 అడుగులు నడవడం ఒక మంచి ప్రారంభం. మన శరీర బరువు, నడిచే వేగాన్ని బట్టి ఇది సుమారు 300 నుంచి 500 వరకు కేలరీలను కరిగిస్తుంది. అయితే కెలొరిక్ డెఫిసిట్ పాటిస్తేనే నడవడం వల్ల మంచి ఫలితం ఉంటుంది.

స్ట్రెంత్ ట్రైనింగ్- మజిల్ డెన్సిటీ పెంచడం ద్వారా బరువు తగ్గడంలో స్ట్రెంత్ ట్రైనింగ్ ఎంతో సహాయపడుతుంది. ఇది మన జీవక్రియ (మెటబాలిజమ్) వేగాన్ని పెంచుతుంది. మనం విశ్రాంతి తీసుకునే సమయంలోనూ శరీరం కేలరీలను ఖర్చు చేయడానికి లీన్ మజిల్ దోహదపడుతుంది.

వాటర్- మన శరీరం హైడ్రేటెడ్​గా ఉండాలి. సోడాలు, జ్యూస్‌లు, స్వీటెండ్ కాఫీలకు బదులుగా నీటిని తాగవచ్చు. ఈ ఒక్క చిన్న మార్పుతో మీ రోజువారీ కేలరీల వినియోగాన్ని గణనీయంగా తగ్గించుకోవచ్చు.

ప్రోటీన్- పిండి పదార్థాలు లేదా కొవ్వులతో పోలిస్తే ప్రొటీన్ మన ఆకలిని బాగా సంతృప్తి పరుస్తుంది. ఇది కండరాలను సంరక్షించడంలో సహాయపడుతుంది. కార్బోహైడ్రేట్లు లేదా కొవ్వులతో పోలిస్తే ప్రొటీన్‌ను జీర్ణం చేయడానికి శరీరానికి ఎక్కువ శక్తి అవసరమవుతుంది. తగినంత ప్రొటీన్ తీసుకోవడం వల్ల బరువు తగ్గే సమయంలోనూ కండరాలు కోల్పోకుండా ఉండవచ్చు.

స్లీప్- తగినంత నిద్ర.. ఆకలిని నియంత్రించడంలో సహాయపడుతుంది. మరోవైపు, సరిగ్గా నిద్రపోకపోతే ఆకలి పెరిగి, మరుసటి రోజు ఎక్కువ కేలరీలు ఉన్న ఆహారం తినాలనే కోరిక పెరుగుతుంది. ఈ విధంగా కేవలం సంకల్ప శక్తి ఒక్కదానిపైనే ఆధారపడకుండా.. నడక, స్ట్రెంత్ ట్రైనింగ్, నీరు, ప్రొటీన్, నిద్ర అనే ఈ ఐదు అంశాలను క్రమం తప్పకుండా పాటిస్తే బరువు తగ్గే ప్రయాణం చాలా సులభతరమవుతుంది.