డాక్టర్ ఇంట్లో డ్రగ్స్.. మరోచోట డ్రగ్ పార్టీ భగ్నం, 12 మంది అరెస్ట్!

హైదరాబాద్‌లో ఓ వైద్యుడి ఇంట్లో అధికారులు డ్రగ్స్ గుర్తించారు. మరోచోట గచ్చిబౌలిలో డ్రగ్ పార్టీని భగ్నం చేశారు పోలీసులు. ఈ ఘటనలో 12 మందిని అరెస్ట్ చేశారు.

తాజాగా హైదరాబాద్‌లో డ్రగ్ పార్టీ కలకలం రేపింది. ఇటీవల డ్రగ్ పార్టీలపై పోలీసులు ఫోకస్ చేస్తున్నారు. ఇందులో భాగంగానే తాజాగా రెండు ప్రదేశాల్లో డ్రగ్స్‌కు సంబంధించిన విషయాన్ని గుర్తించి కేసు నమోదు చేశారు. ఓ వైద్యుడు ఇంట్లో భారీగా డ్రగ్స్ ఉన్నట్టుగా గుర్తించారు. మరోవైపు గచ్చిబౌలిలో డ్రగ్ పార్టీని భగ్నం చేశారు.

ప్రతీకాత్మక చిత్రం

ముషీరాబాద్‌లో అద్దెకు ఉంటున్న జాన్‌పాల్ అనే వైద్యుడి ఇంట్లో డ్రగ్స్ ఉన్నట్టుగా పోలీసులకు సమాచారం వచ్చింది. దీంతో అతడి నివాసంలో పోలీసులు తనిఖీలు చేశారు. రూ.3 లక్షల విలువ చేసే డ్రగ్స్‌ ఉన్నట్టుగా గుర్తించి సీజ్ చేశారు. జాన్‌పాల్‌ను అరెస్ట్ చేశారు.

ఈ కేసులో మరో ముగ్గురి మీద కూడా కేసు నమోదు చేశారు. హైదరాబాద్‌కు చెందిన ప్రమోద్, సందీప్, శరత్ ఢిల్లీ, బైంగళూరు నుంచి డ్రగ్స్ తెప్పిస్తున్నారు. వైద్యుడి ఇంట్లో పెట్టి అమ్ముతున్నారు. అయితే జాన్‌పాల్‌కు ఉచితంగా డ్రగ్స్ అందిస్తున్నట్టుగా తేలింది. ముగ్గురు నిందితులు పరారీలో ఉన్నారు.

మరోవైపు గచ్చిబౌలిలోని కో లివింగ్ గెస్ట్ రూములో జరుగుతున్న డ్రగ్స్ పార్టీని ఎస్ఓటీ పోలీసులు భగ్నం చేశారు. మెుత్తం 12 మందిని అరెస్ట్ చేశారు. ఇందులో ఇద్దరు స్మగ్లర్లు ఉన్నారు. కో లివింగ్ రూములో డ్రగ్ పార్టీ జరుగుతుందన్న పక్కా సమాచారంతో దాడి చేశారు. అందరినీ అదుపులోకి తీసుకున్నారు.

ఇందులో కర్ణాటక నుంచి డ్రగ్ర్ తీసుకువచ్చి.. హైదరాబాద్ యువకులకు అమ్ముతున్న మెయిన్ స్మగ్లర్లను పోలీసులు అరెస్ట్ చేశారు. డ్రగ్స్ సరఫరా చేస్తున్న ప్రధాన నిందితుడు గుత్తా తేజ కృష్ణతోపాటుగా నైజీరియన్ దేశస్తుడు కూడా ఉన్నాడు. కర్ణాటక నుంచి డ్రగ్స్ తీసుకువచ్చి.. హైదరాబాద్‌లో సరఫరా చేస్తున్నట్టుగా గుర్తించారు. 12 మందిని పోలీసులు విచారణ చేస్తున్నారు.

ఈ కేసులో భాగంగా డ్రగ్ నెట్‌వర్క్‌లో ఉన్న మిగిలినవారిని కూడా అతి త్వరలో పట్టుకుంటామని పోలీసులు తెలిపారు. కేసుపై మరింత లోతుగా దర్యాప్తు చేస్తున్నారు. ఇతర రాష్ట్రాల నుంచి డ్రగ్స్ తీసుకువస్తున్న విధానంపై పోలీసులు ఫోకస్ చేయనున్నారు. ఇటీవలి కాలంలో హైదరాబాద్‌లో డ్రగ్ పార్టీలు ఎక్కువగా జరుగుతున్నందున వాటిపై ప్రధానంగా దృష్టి పెడుతున్నారు.