E-Paper
చౌటుప్పల్‌లో దారుణం - జోగిని సుధాకర్ హత్య! భారీగా బంగారం, నగదు దోపిడీ
యాదాద్రి భువనగిరి జిల్లా చౌటుప్పల్‌లో అర్ధరాత్రి దారుణం జరిగింది. ప్రముఖ జోగిని రాళ్లబండి సుధాకర్(48)ను దుండగులు హత్య చేశారు. ఇంట్లోని 60 తులాల బంగారం, రూ.10 లక్షల నగదు, కారుతో పరారయ్యారు.
Prefer HTon Google
యాదాద్రి భువనగిరి జిల్లా చౌటుప్పల్ పట్టణంలో అర్ధరాత్రి వేళ దారుణం వెలుగు చూసింది. స్థానికంగా జోగినిగా పేరొందిన రాళ్లబండి సుధాకర్(48)ను గుర్తుతెలియని దుండగులు అత్యంత దారుణంగా హత్య చేశారు. రాత్రి సమయంలో ఇంట్లోకి చొరబడిన గుర్తుతెలియని వ్యక్తులు ఈ ఘాతుకానికి ఒడిగట్టారు.
సుధాకర్‌ను మట్టుబెట్టిన అనంతరం దుండగులు ఇంట్లో ఉన్న భారీ మొత్తంలో ప్రాచీన ఆభరణాలు, సొత్తును దోచుకెళ్లినట్లు తెలిసింది. ప్రాథమిక వివరాల ప్రకారం ఇంట్లో ఉన్న సుమారు 60 తులాల బంగారు ఆభరణాలు, రూ.10 లక్షల నగదును దొంగలు ఎత్తుకెళ్లారు. అంతేకాకుండా, ఘటన అనంతరం ఆనవాళ్లు దొరక్కుండా తప్పించుకునేందుకు సుధాకర్‌కు చెందిన వ్యక్తిగత కారులోనే దుండగులు అక్కడి నుంచి పరారైనట్లు తెలుస్తోంది.
ఈ ఘటనపై సమాచారం అందుకున్న చౌటుప్పల్ పోలీసులు వెంటనే విచారణ రంగంలోకి దిగారు. ఘటనా స్థలానికి చేరుకున్న క్లూస్ టీమ్ మరియు డాగ్ స్క్వాడ్ సిబ్బంది పరిసర ప్రాంతాల్లో క్షుణ్ణంగా తనిఖీలు చేసి కీలక ఆధారాలు సేకరించారు. దొంగతనం కోసం జరిగిన హత్యేనా లేక దీని వెనుక ఏదైనా పాత కక్షలు ఉన్నాయా అనే కోణంలో పోలీసులు దర్యాప్తు వేగవంతం చేశారు.
స్థానిక నిఘా కెమెరాల (సీసీటీవీ) ఫుటేజీ ఆధారంగా పరారైన కారును, దుండగులను గుర్తించేందుకు ప్రత్యేక బృందాలను రంగంలోకి దించారు. ఈ ఘోర హత్యతో చౌటుప్పల్‌లో భయాందోళనలు నెలకొన్నాయి.
