హైదరాబాద్‌లో దారుణం - సీనియర్ న్యాయవాదిని కారుతో ఢీకొట్టి హత్య…! వెలుగులోకి సీసీ పుటేజీ

హైదరాబాద్‌ మాసాబ్ ట్యాంక్‌లో శనివారం ఘోర ప్రమాదం జరిగింది. తన ఇంటి బయట కారు ఎక్కుతున్న లాయర్ ఖాజా మొయినుద్దీన్‌(63)ను ఓ కారు బలంగా ఢీకొట్టగా ప్రాణాలు కోల్పోయాడు. అయితే ముందస్తు ప్లాన్ ప్రకారమే ఇదంతా జరిగినట్లు తెలుస్తోంది. దర్యాప్తులో కీలక విషయాలు బయటికి వస్తున్నాయి.

Hyderabad Advocate Khaja Moizuddin Murder Case : హైదరాబాద్ పరిధిలోని మాసాబ్ ట్యాంక్ లో షాకింగ్ ఘటన వెలుగు చూసింది. తన ఇంటి ముందు ఉన్న కారులో ఎక్కే క్రమంలో సీనియర్ న్యాయవాది ప్రమాదానికి గురయ్యాడు. ఆపై ఆస్పత్రికి తరలించినప్పటికీ గంటల వ్యవధిలోనే ప్రాణాలు కోల్పోయాడు. ఇందుకు సంబంధించిన సీసీ పుటేజీ కూడా వెలుగులోకి వచ్చింది. అయితే ముందస్తు ప్లాన్ ప్రకారమే… న్యాయవాదిని కారుతో ఢీకొట్టి హత్య చేసినట్లు ప్రాథమికంగా తేలింది.

న్యాయవాదిని కారుతో ఢీకొట్టిన దుండగులు

ప్రాథమిక వివరాల ప్రకారం.. సీనియర్ అడ్వకేట్ ఖాజా మొయిజుద్దీన్(63) మసాబ్ ట్యాంక్‌లోని తన నివాసం వెలుపల పార్క్ చేసి ఉన్న తన టొయోటా ఇన్నోవా (Toyota Innova) కారులో బ్యాగును లోపల పెడుతున్నారు. ఆయన డ్రైవింగ్ సీట్ ఎక్కేందుకు సిద్ధమవుతున్న తరుణంలో…. రోడ్డుపై వస్తున్న ఒక గ్రీన్ కలర్ 'మహీంద్రా స్కార్పియో' కారు(నెంబర్ ప్లేట్ లేని) ఒక్కసారిగా అతనిపైకి దూసుకొచ్చింది. అత్యంత వేగంగా వచ్చి మొయిజుద్దీన్‌ను బలంగా ఢీకొట్టింది. ఈ ప్రమాదం దాటికి ఆయన కారు నుంచి దాదాపు 15-20 అడుగుల దూరంలోకి విసిరివేయబడ్డారు. ప్రమాదం జరిగిన వెంటనే సదరు స్కార్పియో డ్రైవర్ వాహనం వెళ్లిపోయింది.

రక్తపు మడుగులో పడి ఉన్న మొయిజుద్దీన్‌ను స్థానికులు గమనించి తక్షణమే సమీపంలోని మహావీర్ ఆసుపత్రికి తరలించారు. అక్కడ ప్రాథమిక చికిత్స అనంతరం మెరుగైన వైద్యం కోసం మరో కార్పొరేట్ ఆసుపత్రికి తరలించగా.. అక్కడ చికిత్స పొందుతూ ఆయన ప్రాణాలు విడిచారు.

వక్ఫ్ భూముల వివాదమే కారణం - లాయర్ కుమారుడి ఆరోపణ

ఈ దారుణ ఘటనపై ఖాజా మొయిజుద్దీన్ కుమారుడు… న్యాయవాది అయిన మహ్మద్ ఫర్హాన్ సంచలన ఆరోపణలు చేశారు. తన తండ్రి మరణం వెనుక పెద్ద కుట్ర దాగి ఉందని ఆయన పేర్కొన్నాడు. వక్ఫ్ భూముల అక్రమ ఆక్రమణలు, ప్రైవేటీకరణకు వ్యతిరేకంగా తన తండ్రి సుదీర్ఘకాలంగా అనేక లీగల్ కేసులు నడుపుతున్నారని వివరించారు. ఈ లీగల్ వివాదాల వల్లే శత్రువులు ప్లాన్ చేసి ఈ దాడికి పాల్పడ్డారని ఆరోపించారు.

గతంలో కూడా తన తండ్రిపై పలుమార్లు దాడులు జరిగాయని, బెదిరింపులు వచ్చాయని ఫర్హాన్ వెల్లడించారు. ఈ హత్య వెనుక ఇద్దరు వ్యక్తుల ప్రమేయం ఉందంటూ వారి పేర్లను ప్రధాన అనుమానితులుగా పేర్కొని…. వారిపై సమగ్ర విచారణ జరపాలని డిమాండ్ చేశారు.

రంగంలోకి ప్రత్యేక బృందాలు…

ఈ ఘటనపై నాంపల్లి పోలీస్ స్టేషన్ పరిధిలో హిట్ అండ్ రన్ (Hit-and-Run) కేసు నమోదైంది. కారు ప్రమాద తీవ్రత, కుటుంబ సభ్యుల ఆరోపణల నేపథ్యంలో పోలీసులు కేసును హత్య కోణంలో దర్యాప్తు చేస్తున్నారు. నిందితులను పట్టుకోవడంతో పాటు ప్రమాదానికి కారణమైన మహీంద్రా స్కార్పియో కారును స్వాధీనం చేసుకోవడానికి నాలుగు ప్రత్యేక పోలీసు బృందాలను రంగంలోకి దించినట్లు సీనియర్ పోలీస్ అధికారి తెలిపారు.

ఈ సంఘటన హైదరాబాద్ లాయర్ల వర్గాల్లో తీవ్ర ఆందోళనకు దారితీసింది. సున్నితమైన, వివాదాస్పదమైన కేసులను డీల్ చేసే న్యాయవాదులకు తగిన రక్షణ కల్పించాలని, ఖాజా మొయిజుద్దీన్ మృతికి కారణమైన వారిపై తక్షణమే కఠిన చర్యలు తీసుకోవాలని పలువురు న్యాయవాదులు డిమాండ్ చేస్తున్నారు. ఈ ఘటనను ఖండిస్తూ తెలంగాణ హైకోర్టు బార్ అసోసియేషన్ ఓ ప్రకటనను విడుదల చేసింది. సమగ్రమైన విచారణ జరిపించి… నిందితులపై కఠిన చర్యలు తీసుకోవాలని డిమాండ్ చేసింది.