Hyderabad Crime News : బొల్లారంలో దారుణం - చిన్నారిని కిడ్నాప్ చేసి హత్య! వాటర్ ట్యాంక్‌లో డెడ్ బాడీ

హైదరాబాద్‌లోని బొల్లారంలో కనిపించకుండా పోయిన ఓ చిన్నారి విల్లా వాటర్ ట్యాంక్‌లో మృతదేహమై తేలింది. కాళ్లు, చేతులు కట్టేసి ఉన్న ఈ ఘటనపై స్థానికులు తీవ్ర దిగ్భ్రాంతి వ్యక్తం చేస్తున్నారు.

మేడ్చల్-మల్కాజిగిరి జిల్లా పరిధిలోని బొల్లారం పోలీస్ స్టేషన్ సరిహద్దుల్లో దారుణం వెలుగుచూసింది. శనివారం నుంచి కనిపించకుండా పోయిన ఓ మైనర్ బాలిక…. ఆదివారం తెల్లారేసరికి విల్లాలోని వాటర్ ట్యాంక్‌లో శవమై తేలింది. ఈ ఘటన స్థానికంగా తీవ్ర కలకలం రేపింది.

బొల్లారంలో దారుణం - చిన్నారిని కిడ్నాప్ చేసి హత్య!

వాటర్ ట్యాంకులో డెడ్ బాడీ….

బొల్లారం పోలీసుల కథనం ప్రకారం.. కౌకూర్ ప్రాంతంలోని 'విల్లా ఆర్చిడ్స్' అపార్ట్‌మెంట్ కాంప్లెక్స్‌లో శనివారం ఒక చిన్నారి అకస్మాత్తుగా కనిపించకుండా పోయింది. కుటుంబ సభ్యులు పరిసర ప్రాంతాల్లో ఎంత వెతికినా బాలిక జాడ దొరకలేదు. ఆదివారం ఉదయం విల్లాలోని నీటి ట్యాంక్‌ను పరిశీలించగా అందులో బాలిక మృతదేహం కనిపించింది.

ట్యాంక్‌లో చిన్నారి కాళ్లు, చేతులు తీగలు లేదా తాళ్లతో ముడివేసి ఉన్నట్లు పోలీసులు గుర్తించారు. దీంతో ఇది కేవలం ప్రమాదవశాత్తు జరిగింది కాదని… పక్కా ప్రణాళిక ప్రకారం జరిగిన హత్యేనని ప్రాథమికంగా భావిస్తున్నారు.

బాలిక మృతి వెనుక అదే అపార్ట్‌మెంట్ కాంప్లెక్స్‌లో పనిచేస్తున్న వాచ్‌మన్‌ ప్రమేయం ఉందంటూ చిన్నారి కుటుంబ సభ్యులు తీవ్రంగా అనుమానిస్తున్నారు. తమ పాపను అతడే కిడ్నాప్ చేసి, హత్య చేసి ట్యాంక్‌లో పడేసి ఉంటాడని వారు బొల్లారం పోలీసులకు ఫిర్యాదు చేశారు.

సమాచారం అందుకున్న వెంటనే బొల్లారం పోలీసులు ఘటనా స్థలానికి చేరుకుని దర్యాప్తు వేగవంతం చేశారు. క్లూస్ టీమ్, డాగ్ స్క్వాడ్‌ను రప్పించి శాంపిల్స్ సేకరించారు. మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు.

"మేము అన్ని కోణాల్లోనూ కేసును సమగ్రంగా విచారిస్తున్నాం. అనుమానితులను అదుపులోకి తీసుకుని విచారిస్తున్నాం. పూర్తి వివరాలు విచారణ అనంతరం వెల్లడిస్తాం," అని దర్యాప్తు అధికారులు తెలిపారు. ఒక పసిపాప కాళ్లు, చేతులు కట్టేసి నీటి ట్యాంక్‌లో పడేసిన తీరు స్థానికులను తీవ్ర భయాందోళనలకు గురిచేసింది.