తెలంగాణలో పెండింగ్‌ ట్రాఫిక్ చలాన్‌లపై తగ్గింపు న్యూస్.. క్లారిటీ ఇచ్చిన పోలీసులు!

వాహనాలపై ట్రాఫిక్ చలాన్ల తగ్గింపు మీద ఇటీవల ఓ వార్త ఎక్కువగా వైరల్ అవుతోంది. అయితే దీనిపై పోలీసులు క్లారిటీ ఇచ్చారు.

పెండింగ్ ట్రాఫిక్ చలాన్లు ఉన్నవారికి మంచి ఛాన్స్ వచ్చిందంటూ ఇటీవల ఓ వార్త బాగా వైరల్ అయింది. ట్రాఫిక్ నిబంధనలు ఉల్లంఘించినవారికి ఉపశమనం కలిగించేలా డిసెంబర్ రెండో వారంలో అవకాశం వచ్చిందని చాలా వార్తలు వచ్చాయి. దేశవ్యాప్త లోక్ అదాలత్‌లో పెండింగ్ చలాన్లపై 50 శాతం నుండి 100 శాతం వరకు తగ్గింపును అందుకోవచ్చని ఫేక్ న్యూస్ వచ్చింది.

ట్రాఫిక్ చలాన్లపై తగ్గింపు

ఆ ఫేక్ న్యూస్‌లో డిసెంబర్ 13వ తేదీన జరిగే జాతీయ లోక్ అదాలత్‌లో పెండింగ్ చలాన్లు, పెనాల్టీలు సెటిల్ చేసుకోవచ్చని తెలిపారు. భారీగా తగ్గింపును పొందవచ్చన్నారు. తెలంగాణతోపాటుగా మరికొన్ని రాష్ట్రాలు రాయితీ ట్రాఫిక్ చలాన్‌లను అందించడంలో పాల్గొంటున్నాయని వార్త బాగా సర్క్యూలేట్ అయింది. తెలంగాణ, పశ్చిమ బెంగాల్, ఢిల్లీ, హర్యానా, పంజాబ్, మహారాష్ట్ర, ఉత్తరప్రదేశ్, గుజరాత్, తమిళనాడు, కర్ణాటక, రాజస్థాన్ రాష్ట్రాలు ఈ లిస్టులో ఉన్నాయని చెప్పుకొచ్చారు.

హెల్మెట్ లేదా సీట్ బెల్ట్ లేకుండా వాహనం నడపడం, రెడ్ సిగ్నల్స్ జంప్, అతివేగం, తప్పు పార్కింగ్, గడువు ముగిసిన పీయూసీ, చెల్లుబాటు అయ్యే లైసెన్స్ లేకుండా డ్రైవింగ్ చేయడం, నంబర్ ప్లేట్లు లేకపోవడం లేదా అసంపూర్ణ ఫిట్‌నెస్ సర్టిఫికెట్, తప్పుగా జారీ చేసిన చలాన్లు, పెండింగ్‌లో ఉన్న పాత ఈ-చలాన్లను లోక్ అదాలత్ సందర్భంగా సెటిల్ చేసుకోవచ్చని తప్పుడు సమాచారం వ్యాప్తి జరిగింది. తాజాగా దీనిపై తెలంగాణ పోలీసులు క్లారిటీ ఇచ్చారు.

తెలంగాణలో ట్రాఫిక్ చలాన్ల మాఫీపై రాచకొండ పోలీసులు స్పందించారు. 100 శాతం ట్రాఫిక్ చలాన్ల మాఫీ వార్తలు నమ్మవద్దన్నారు. సోషల్ మీడియాలో వచ్చే తప్పుడు వార్తలను నమ్మకూడదని చెప్పారు. ట్రాఫిక్ చలాన్ల మాఫీపై లోక్ అదాలత్, పోలీసులు ఎటువంటి ప్రకటన చేయలేదని స్పష్టం చేశారు.