SIR in Telangana : ముమ్మరంగా ఓటర్ల జాబితా సవరణ - రాష్ట్రవ్యాప్తంగా 1.43 కోట్ల పత్రాల పంపిణీ

Telangana SIR Exercise : తెలంగాణలో ఓటర్ల జాబితా ప్రత్యేక ముమ్మర సవరణ (SIR) ప్రక్రియ వేగంగా సాగుతోంది. రాష్ట్రవ్యాప్తంగా ఇప్పటివరకు 1.43 కోట్ల ఎన్యూమరేషన్ ఫారాలను పంపిణీ చేసినట్లు ఎన్నికల సంఘం ప్రకటించింది.

Telangana SIR Exercise : తెలంగాణలో ఓటర్ల జాబితా ప్రత్యేక ముమ్మర సవరణ (SIR) ప్రక్రియ అత్యంత వేగంగా ముందుకు సాగుతోంది. ఈ ప్రత్యేక డ్రైవ్‌లో భాగంగా రాష్ట్రవ్యాప్తంగా ఇప్పటివరకు 1,43,17,635 ఎన్యూమరేషన్ ఫారాలను పంపిణీ చేశారు. దీని ద్వారా రాష్ట్రంలోని 42.33 శాతం ప్రాంతాన్ని కవర్ చేసినట్లు తెలంగాణ రాష్ట్ర ఎన్నికల సంఘం వెల్లడించింది.

ఎన్యూమరేషన్‌ పత్రాల పంపిణీ

తెలంగాణలో గురువారం నుంచే ఈ ఓటర్ల జాబితా ముమ్మర సవరణ ప్రక్రియ అధికారికంగా ప్రారంభమైంది. దేశవ్యాప్తంగా ఉన్న 16 రాష్ట్రాలు, మూడు కేంద్రపాలిత ప్రాంతాల్లోని దాదాపు 36 కోట్ల మంది ఓటర్లను కలుపుకుంటూ ఫేజ్-3 కింద ఈ ప్రత్యేక ముమ్మర సవరణను చేపడుతున్నట్లు భారత ఎన్నికల సంఘం (ECI) మే 14నే ప్రకటించింది. ఇందులో భాగంగానే తెలంగాణలోనూ కసరత్తు జరుగుతోంది.

జనగణనతో అనుసంధానం…

ప్రస్తుతం దేశంలో జరుగుతున్న జనగణన (సెన్సస్) హౌస్ లిస్టింగ్ ప్రక్రియతో సమన్వయం చేసుకుంటూ ఈ ఓటర్ల సవరణ కార్యక్రమాన్ని రూపొందించినట్లు ఎన్నికల సంఘం ఓ ప్రకటనలో పేర్కొంది. దీనివల్ల క్షేత్రస్థాయిలో అందుబాటులో ఉన్న యంత్రాంగాన్ని, సిబ్బందిని సమర్థవంతంగా వినియోగించుకోవడానికి వీలవుతుందని వివరించింది. ఈ సవరణ ప్రక్రియకు సంబంధించి ఎన్నికల సంఘం స్పష్టమైన కాలపరిమితితో కూడిన షెడ్యూల్‌ను ఖరారు చేసింది.

కీలకమైన తేదీలు - షెడ్యూల్ వివరాలు

తెలంగాణతో పాటు పంజాబ్ రాష్ట్రానికి ఓటరుగా నమోదు చేసుకోవడానికి 2026 అక్టోబర్ 1వ తేదీని అర్హత తేదీగా (Qualifying Date) నిర్ణయించారు. అంటే ఈ తేదీ నాటికి 18 ఏళ్లు నిండిన వారందరూ కొత్త ఓటరుగా నమోదు చేసుకోవడానికి అర్హులు.

• సన్నాహక దశ (Preparation Phase): 2026 జూన్ 15 నుండి జూన్ 24 వరకు ఈ ప్రక్రియను నిర్వహించారు.
• బీఎల్ఓల ఇంటింటి సర్వే (BLO Visits): 2026 జూన్ 25న ప్రారంభమైన ఈ సర్వే జూలై 24 వరకు కొనసాగుతుంది. బూత్ స్థాయి అధికారులు (BLO) ప్రతి ఇంటికి వెళ్లి వివరాలను సేకరిస్తారు.
• రేషనలైజేషన్: పోలింగ్ కేంద్రాల సర్దుబాటు, ఇతర సాంకేతిక ప్రక్రియలను 2026 జూలై 24 లోగా పూర్తి చేస్తారు.
• నమోదు ముసాయిదా ప్రచురణ : 2026 జూలై 31న ఓటర్ల జాబితా ముసాయిదాను అధికారికంగా విడుదల చేస్తారు.
• అభ్యంతరాలు, క్లెయిమ్‌ల స్వీకరణ: ముసాయిదా జాబితాపై ఏవైనా అభ్యంతరాలు ఉంటే లేదా కొత్తగా పేర్లు నమోదు చేసుకోవాలనుకుంటే 2026 జూలై 31 నుండి ఆగస్టు 30 వరకు గడువు ఉంటుంది.
• నోటీసుల జారీ, పరిష్కారం: అందిన దరఖాస్తులు, అభ్యంతరాలను పరిశీలించి పరిష్కరించే ప్రక్రియ 2026 జూలై 31 నుండి సెప్టెంబర్ 28 వరకు కొనసాగుతుంది.
• తుది ఓటర్ల జాబితా విడుదల: అన్ని సవరణలు పూర్తి చేసిన తర్వాత 2026 అక్టోబర్ 1న తుది ఓటర్ల జాబితాను (Final Electoral Roll) అధికారికంగా ప్రచురిస్తారు.
• తెలంగాణ వ్యాప్తంగా అర్హులైన ప్రతి ఒక్కరికీ ఓటు హక్కు కల్పించడమే లక్ష్యంగా ఎన్నికల సంఘం ఈ బృహత్తర కార్యక్రమాన్ని నిర్వహిస్తోంది.