టీజీఎస్ఆర్టీసీ కార్తీక మాసం స్పెషల్.. బడ్జెట్ ధరలో శైవ క్షేత్రాలకు ప్రత్యేక బస్సులు!

కార్తీక మాసం సందర్భంగా టీజీఎస్ఆర్టీసీ భక్తులకు శుభవార్త అందించింది. శైవ క్షేత్రాలకు భక్తుల సౌకర్యార్థం ప్రత్యేక బస్సులను నడుపుతోంది.

కార్తీక మాసం శివుడికి ఎంతో ఇష్టమైనది. ఈ మాసంలో నదీ స్నానాలు, ఆలయాల సందర్శన ఎక్కువగా చేస్తారు. చాలా మంది భక్తులు శైవ క్షేత్రాలను దర్శించుకుంటారు. అయితే భక్తుల సౌకర్యార్థం టీజీఎస్ఆర్టీసీ ప్రసిద్ధ పంచారామాలకు, శైవ క్షేత్రాలకు ప్రత్యేక బస్సులను నడుపుతోంది.

కార్తీక మాసం ప్రత్యేక బస్సులు

మరిన్ని వివరాలకు మీ సమీపంలోని టీజీఎస్ఆర్టీసీ బస్ డిపో మేనేజర్‌ను సంప్రదించండి. హెల్ప్ లైన్ నెంబర్లకు కూడా కాల్ చేసి వివరాలు తెలుసుకోవచ్చు. 040-23450033, 040-69440000 నెంబర్లను సంప్రదించాలి.

అమరావతి అమరేశ్వరాలయం, భీమవరం సోమేశ్వరాలయం, పాలకొల్లు క్షీర రామలింగేశ్వరాలయం, ద్రాక్షారామం భీమేశ్వరాలయం, సామర్లకోట కుమార రామ భీమేశ్వరాలయం.. పంచారామాల దర్శనం ఉంటుంది. అయితే మీ సమీపంలోని బస్ డిపో మేనేజర్‌ని సంప్రదించి పూర్తి వివరాలు తెలుసుకోవచ్చు.

అంతేకాదు అరుణాచలం గిరి ప్రదక్షిణకు కూడా వెళ్లేందుకు కూడా టీజీఎస్ఆర్టీసీ బస్సులను నడుపుతోంది. అయితే స్థానికంగా ఈ టూర్‌కి సంబంధించిన వివరాలను తెలుసుకోవచ్చు. పరిగి నుంచి అరుణాచలం గిరి ప్రదక్షిణ టూర్ ఉంది. నవంబర్ 3వ తేదీన బస్సు బయలుదేరుతుంది. కాణిపాకం, వేలూరి మహాలక్ష్మి ఆలయం గోల్డెన్ టెంపుల్, అరుణాచలం గిరి ప్రదక్షిణం చేస్తారు. మూడు రోజుల యాత్రకు టికెట్ ధర రూ.2000గా ఉంది.

వికారాబాద్, తాండూరు ప్రయాణికుల కోసం టీజీఎస్ఆర్టీసీ ప్రత్యేక బస్సులను నడిపిస్తోంది. శ్రీశైలం, పంచారామాలు, అరుణాచలం వెళ్లాలి అనుకునేవారు బుకింగ్ చేసుకోవచ్చు. ఒకవేళ మీకు తెలిసిన 30 మంది ఒకే దగ్గర ఉంటే కూడా బస్ బుక్ చేసుకుంటే దానికి అనుగుణంగా తేదీని నిర్ణయిస్తారు. ఈ అవకాశాన్ని భక్తులు సద్వినియోగం చేసుకోవాలి. ఈ నెంబర్‌ 8309348157 కాల్ చేసి వివరాలు తెలుసుకోవచ్చు.