నిజామాబాద్ : శ్రీరాంసాగర్ ప్రాజెక్ట్‌లో తీవ్ర విషాదం - నీటిలో మునిగి నలుగురు యువకులు మృతి!

SRSP Nizamabad Drowning Incident : నిజామాబాద్ జిల్లా శ్రీరాంసాగర్ ప్రాజెక్ట్ లో ఈతకు వెళ్లిన నలుగురు యువకులు నీటిలో మునిగిపోయారు. ఇప్పటివరకు ముగ్గురి మృతదేహాలను వెలికితీయగా…. మరో యువకుడి కోసం గాలింపు చర్యలు కొనసాగుతున్నాయి.

SRSP Nizamabad Drowning Incident : నిజామాబాద్ జిల్లా శ్రీరాంసాగర్ ప్రాజెక్ట్ (ఎస్సారెస్పీ) వద్ద తీవ్ర విషాదకర సంఘటన చోటుచేసుకుంది. ప్రాజెక్ట్ వద్దకు వెళ్లిన నలుగురు యువకులు అనుకోకుండా నీటి ప్రవాహంలో చిక్కుకుని మునిగిపోయారని పోలీసులు వెల్లడించారు. ఈ ప్రమాదంలో ఇప్పటివరకు ముగ్గురు యువకుల మృతదేహాలను సహాయక బృందాలు వెలికితీశాయి. గల్లంతైన మరో నాలుగో వ్యక్తి కోసం గాలింపు చర్యలు ముమ్మరంగా కొనసాగుతున్నాయి.

నిజామాబాద్ శ్రీరాంసాగర్ ప్రాజెక్ట్‌లో తీవ్ర విషాదం

స్థానిక సమాచారం మేరకు…. సదరు నలుగురు యువకులు సరదాగా గడపడానికి శ్రీరాంసాగర్ ప్రాజెక్ట్ వద్దకు వచ్చి నీటిలోకి దిగారు. నీటి లోతు, ప్రవాహ తీవ్రతను అంచనా వేయలేకపోవడంతో ఒక్కసారిగా లోతుల్లోకి జారుకుని మునిగిపోయారు. ఈ ప్రమాదాన్ని గమనించిన స్థానికులు వెంటనే పోలీసులకు సమాచారం అందించారు. ఘటనపై సమాచారం అందుకున్న వెంటనే నిజామాబాద్ జిల్లా పోలీసులు, ప్రత్యేక సహాయక (రెస్క్యూ) బృందాలు హుటాహుటిన ఘటనా స్థలానికి చేరుకుని విస్తృతంగా గాలింపు చర్యలు చేపట్టాయి.

తీవ్రంగా శ్రమించిన రెస్క్యూ సిబ్బంది ప్రాజెక్ట్ నీటి నుంచి ముగ్గురు యువకుల మృతదేహాలను బయటకు తీశారు. నీటిలో కొట్టుకుపోయిన నాలుగో యువకుడి ఆచూకీ కోసం గాలించేందుకు ప్రత్యేక బోట్లు… ఈతగాళ్లతో జల్లెడ పడుతున్నారు.

ఈ ప్రమాదంలో మృతి చెందిన నలుగురు యువకుల గుర్తింపునకు సంబంధించి పోలీసులు ప్రాథమిక వివరాలు వెల్లడించారు. మరణించిన వారిలో ముగ్గురు యువకులు నిజామాబాద్ పట్టణ పరిధిలోని ఆర్షపల్లి ప్రాంతానికి చెందినవారు కాగా… నాలుగో యువకుడు హైదరాబాద్ నివాసిగా అధికారులు గుర్తించారు. సరదాగా గడిపేందుకు వచ్చి ఇలా ప్రాణాలు కోల్పోవడంతో ఆయా కుటుంబాల్లో తీవ్ర విషాదచ్ఛాయలు అలముకున్నాయి.

నీటి నుంచి వెలికితీసిన ముగ్గురు యువకుల మృతదేహాలను పంచనామా అనంతరం శవపరీక్ష (పోస్ట్‌మార్టం) నిమిత్తం సమీపంలోని ప్రభుత్వ ఆసుపత్రికి తరలించినట్లు నిజామాబాద్ పోలీసులు తెలిపారు. ఈ ఘటనపై కేసు నమోదు చేసుకున్న పోలీసులు, ప్రమాదానికి గల పూర్తి కారణాలపై సమగ్ర విచారణ జరుపుతున్నారు.