హైదరాబాద్ : ఎలివేటెడ్ కారిడార్ నిర్మాణ పనులతో ఈ రూట్‌లో 9 నెలలు ట్రాఫిక్ మళ్లింపు

జాతీయ రహదారి 44పై ప్యారడైజ్ జంక్షన్-డైరీ ఫామ్ రోడ్డు వరకు ఎలివేటెడ్ కారిడార్ నిర్మాణ పనులు మెుదలుకానున్నాయి. దీంతో 9 నెలలపాటు ట్రాఫిక్ మళ్లింపు ఉండనుంది.

జాతీయ రహదారి 44పై ప్యారడైజ్ జంక్షన్-డైరీ ఫామ్ రోడ్డు వరకు ఎలివేటెడ్ కారిడార్ నిర్మాణ పనులు మెుదలుకానున్న నేపథ్యంలో ఈ నెల 30.10.2025 నుంచి ట్రాఫిక్ మళ్లింపు ఉండనుంది. దాదాపు తొమ్మిది నెలల పాటు ట్రాఫిక్ పనులు నడవనున్నాయి. ఈ మేరకు అధికారులు ట్రాఫిక్ మళ్లింపు గురించి వివరాలు వెల్లడించారు.

ట్రాఫిక్ మళ్లింపు

సికింద్రాబాద్‌లోని ప్యారడైజ్ జంక్షన్ నుండి NH-44లోని డైరీ ఫామ్ రోడ్డు వరకు ఎలివేటెడ్ కారిడార్ నిర్మాణ పనులను సులభతరం చేయడానికి అక్టోబర్ 30 నుండి దాదాపు తొమ్మిది నెలల పాటు ట్రాఫిక్ మళ్లింపులు అమలు చేస్తామని అధికారులు ప్రకటించారు. రాజీవ్ గాంధీ విగ్రహం జంక్షన్, బాలంరాయి మధ్య రెండు వైపులా మార్గాన్ని మూసివేస్తామని ట్రాఫిక్ పోలీసులు తెలిపారు. వాహనదారులు ప్రత్యామ్నాయ మార్గాలను తీసుకోవాలని సూచించారు.

బాలానగర్ వైపు నుండి పంజాగుట్ట/ట్యాంక్ బండ్ వైపు వెళ్లే ట్రాఫిక్ తాడ్‌బండ్, మస్తాన్ కేఫ్, డైమండ్ పాయింట్, ముడ్‌ఫోర్ట్, NCC ప్రధాన కార్యాలయం, JBS, SBI మీదుగా వెళ్ళవచ్చు.

సుచిత్ర వైపు నుండి పంజాగుట్ట/ట్యాంక్ బండ్ వైపు వెళ్లే ట్రాఫిక్ సేఫ్ ఎక్స్‌ప్రెస్, బాపూజీనగర్, సెంటర్ పాయింట్, డైమండ్ పాయింట్, ముడ్‌ఫోర్ట్, JBS, SBI ద్వారా మార్గాన్ని ఉపయోగించవచ్చు.

ట్యాంక్ బండ్/రాణిగంజ్/పంజాగుట్ట/రసూల్‌పురా/ప్లాజా నుంచి సీటీఓ జంక్షన్ మీదుగా తాడ్‌బండ్ వైపు వచ్చే ట్రాఫిక్ రాజీవ్ గాంధీ విగ్రహం జంక్షన్ వద్ద అన్నానగర్, బలంరాయ్, తాడ్‌బండ్ వైపు మళ్లిస్తారు.

అన్నానగర్ నుండి పంజాగుట్ట/ట్యాంక్ బండ్ వైపు వెళ్లాలనుకునే వాహనదారులు రాజీవ్ గాంధీ విగ్రహం జంక్షన్ వైపు వెళ్లకుండా.. బైలేన్‌లను (మీటింగ్ పాయింట్ బైలేన్, హాకీ గ్రౌండ్ బైలేన్ మరియు పోలీస్ స్టేషన్ బైలేన్) ఉపయోగించాలని సూచించారు. ప్రత్యామ్నాయంగా బాలంరాయ్ ద్వారా వెళ్ళవచ్చు.