ఐఎండీ వెదర్ రిపోర్ట్ : ఈనెల 24న బంగాళాఖాతంలో అల్పపీడనం - ఏపీ, తెలంగాణలో మళ్లీ వర్షాలు...!

వాతావరణశాఖ కీలక అప్డేట్ ఇచ్చింది. ఈనెల 24వ తేదీన ఆగ్నేయ బంగాళాఖాతంలో అల్పపీడనం ఏర్పడే అవకాశం ఉంది. ఇది క్రమంగా వాయుగుండంగా మారుతుందని అంచనా వేసింది.ఈ ప్రభావంతో ఏపీ, తెలంగాణలో మళ్లీ వర్షాలు పడనున్నాయి.

తెలుగు రాష్ట్రాల్లో మళ్లీ వర్షాలు పడనున్నాయి. ఈ మేరకు వాతావరణశాఖ కీలక అప్డేట్ ఇచ్చింది. అక్టోబర్ 24న ఆగ్నేయ బంగాళాఖాతంలో అల్పపీడనం ఏర్పడే అవకాశం ఉందని అంచనా వేసింది. ఇది పశ్చిమ-వాయువ్య దిశగా కదిలి మరింత బలపడే అవకాశం ఉందని…. అక్టోబర్ 26న ఇది వాయుగుండంగా మారే అవకాశం ఉందని వివరించింది.

ఐఎండీ వెదర్ అప్డేట్

అల్పపీడనం, వాయుగుండం ప్రభావంతో తెలుగు రాష్ట్రాల్లోని పలు ప్రాంతాల్లో మోస్తారు నుంచి భారీ వర్షాలు పడొచ్చు. కొన్నిచోట్ల ఉరుములు, మెరుపులు, ఈదురుగాలులతో కూడిన వానలు పడుతాయని ఐఎండీ అంచనా వేస్తోంది.

మరోవైపు ఈశాన్య రుతుపవనాల ప్రభావంతో శనివారం (అక్టోబర్ 18) నెల్లూరు, చిత్తూరు, తిరుపతి జిల్లాల్లో అక్కడక్కడ పిడుగులతో కూడిన మోస్తరు నుంచి భారీ వర్షాలు కురిసే అవకాశం ఉంది. ఈ మేరకు విపత్తుల నిర్వహణ సంస్థ ఓ ప్రకటన విడుదల చేసింది.

ఇక శ్రీకాకుళం, విజయనగరం,మన్యం,విశాఖ,అనకాపల్లి, కాకినాడ,కోనసీమ,కృష్ణా, ప్రకాశం,అనంతపురం,శ్రీసత్యసాయి, కడప,అన్నమయ్య జిల్లాల్లో అక్కడక్కడ పిడుగులతో కూడిన తేలికపాటి నుంచి మోస్తరు వర్షాలు పడే సూచనలున్నాయి. మిగతా జిల్లాల్లో కొన్ని చోట్ల తేలికపాటి వర్షాలు కురిసే అవకాశం ఉందని వెల్లడించింది. ప్రజలంతా అప్రమత్తంగా ఉండాలని, చెట్లు, భారీ హోర్డింగ్స్ వద్ద నిలబడవద్దని హెచ్చరించింది.

ఈ జిల్లాలకు ఎల్లో హెచ్చరికలు

ఇక తెలంగాణలోనూ వారం రోజుల పాటు వర్షాలు పడనున్నాయి. ఇవాళ(అక్టోబర్ 18) వికారాబాద్, సంగారెడ్డి, మెదక్, కామారెడ్డి, మహబూబ్ నగర్, నాగర్ కర్నూల్, వనపర్తి, నారాయణపేట, గద్వాల జిల్లాల్లో ఉరుములు, మెరుపులతో కూడిన వానలు పడనున్నాయి. ఈ జిల్లాలకు ఎల్లో హెచ్చరికలు జారీ అయ్యాయి.