ఆంధ్రప్రదేశ్‌లో మరో గోల్డ్ మైన్.. కేజీఎఫ్ రేంజ్ నిక్షేపాలు.. వేలం వేసేందుకు సిద్ధం!

చిత్తూరు జిల్లాలోని చిగురుగుంట-బిసనాథం బంగారు గనుల బ్లాక్ కోసం కొత్త వేలం ప్రక్రియను ప్రారంభించేందుకు రాష్ట్ర ప్రభుత్వం సన్నాహాలు చేస్తోంది. కోలార్ షిస్ట్ బెల్ట్‌లో కీలకమైన ప్రదేశంలో ఉండటం, అధిక నాణ్యత గల నిల్వలను కలిగి ఉండటంతో దీనిపై ఆసక్తి నెలకొంది.

ఆంధ్రప్రదేశ్ రాష్ట్రంలో పారిశ్రామిక రంగానికి ఊతమిచ్చేలా, ఖనిజ సంపదను వెలికితీసే దిశగా కూటమి ప్రభుత్వం వేగంగా అడుగులు వేస్తోంది. ముఖ్యంగా రాయలసీమ ప్రాంతాన్ని గోల్డ్ మైనింగ్ హబ్‌గా మార్చేందుకు ప్రణాళికలు సిద్ధమవుతున్నాయి. ఇందులో భాగంగా చిత్తూరు జిల్లాలోని చిగురుగుంట-బిసనాథం బంగారు బ్లాక్ (Chigurgunta-Bisanatham Gold Block)ను వేలం వేసేందుకు ఏపీ ప్రభుత్వం సిద్ధం అవుతోంది.

ఏపీలో మరో గోల్డ్ మైన్

చిత్తూరు జిల్లా పరిధిలోని ఈ ప్రాంతం దేశంలోనే అత్యంత కీలకమైన బంగారు నిక్షేపాలు కలిగిన ప్రాంతంగా గుర్తింపు పొందింది. ప్రసిద్ధ కోలార్ స్కిస్ట్ బెల్ట్ పొడిగింపులోనే ఈ చిగురుకుంట-బిసనాథం బ్లాక్ ఉంది. ఇక్కడి గనుల్లో లభ్యమయ్యే బంగారం అత్యంత నాణ్యమైనదిగానిపుణులు తేల్చారు.

గతంలో ఇక్కడ మైనింగ్ కార్యకలాపాలు సాగినప్పటికీ, కొన్ని కారణాల వల్ల నిలిచిపోయాయి. ఇప్పుడు ఆధునిక సాంకేతికతతో ఈ నిక్షేపాలను వెలికితీస్తే, ప్రభుత్వానికి భారీగా ఆదాయం రావడంతో పాటు స్థానికులకు వేలాదిగా ఉపాధి అవకాశాలు లభిస్తాయి.

మరోవైపు, రాష్ట్రంలో పారిశ్రామిక పెట్టుబడులకు నూతనోత్తేజం ఇస్తూ కర్నూలు జిల్లా తుగ్గలి మండలం జొన్నగిరి బంగారు గని వద్ద జూన్ 24న ముఖ్యమంత్రి నారా చంద్రబాబు నాయుడు మైనింగ్ ప్లాంట్ కార్యకలాపాలను అధికారికంగా ప్రారంభించారు.

జియోమైసూర్ సర్వీసెస్ ఇండియా ప్రైవేట్ లిమిటెడ్ ఈ ప్రాజెక్టును ప్రతిష్టాత్మకంగా చేపట్టింది. భారతదేశంలో ప్రైవేట్ రంగంలో పూర్తిస్థాయిలో కార్యకలాపాలు ప్రారంభించిన తొలి స్వదేశీ బంగారు గనుల ప్రాజెక్టుగా జొన్నగిరి సరికొత్త రికార్డు సృష్టించింది. ఈ ప్లాంట్ ద్వారా ఏటా పెద్ద ఎత్తున బంగారాన్ని శుద్ధి చేయనున్నారు.

జొన్నగిరి ప్లాంట్ ద్వారా ఏపీలో మైనింగ్ రంగానికి అంతర్జాతీయ స్థాయిలో గుర్తింపు లభించనుంది. రాయలసీమ ప్రాంతంలోని చిత్తూరు, కర్నూలు, అనంతపురం జిల్లాల్లో ఉన్న ఖనిజ నిక్షేపాలపై అంతర్జాతీయ సంస్థలు దృష్టి సారించే అవకాశం ఉంది. చిగురుకుంట-బిసనాథం గనుల వేలం కూడా పూర్తయితే, రాబోయే రోజుల్లో ఆంధ్రప్రదేశ్ దేశంలోనే అతిపెద్ద బంగారు ఉత్పాదక రాష్ట్రంగా అవతరించనుంది.