గ్రామ, వార్డు సచివాలయ ఉద్యోగుల ప్రమోషన్లపై అధ్యయనానికి మంత్రివర్గ ఉప సంఘం

ఏపీలో గ్రామ, వార్డు సచివాలయ ఉద్యోగుల ప్రమోషన్లపై ప్రభుత్వం కసరత్తు మెుదలుపెట్టింది. పదోన్నతులపై అధ్యయనం చేయడానికి మంత్రివర్గ ఉపసంఘం ఏర్పాటు చేశారు.

ఆంధ్రప్రదేశ్ ప్రభుత్వం గ్రామ, వార్డు సచివాలయ ఉద్యోగులకు ప్రమోషన్లు ఖరారు చేయడం, మార్గనిర్దేశం చేసేందుకు మంత్రివర్గ ఉప సంఘాన్ని ప్రభుత్వం ఏర్పాటు చేసింది. మెుత్తం 10 మంది మంత్రులతో కేబినెట్ సబ్ కమిటీని ఏర్పాటు చేస్తున్నట్టుగా ప్రభుత్వ ప్రధాన కార్యదర్శి విజయానంద్ ఉత్తర్వులు జారీ చేశారు.

ఈ మంత్రుల కమిటీలో సభ్యులు

ఏపీ ప్రభుత్వం

ఉప ముఖ్యమంత్రి పవన్ కల్యాణ్, మంత్రులు అనిత, నారాయణ, అచ్చెన్నాయుడు, డీఎస్‌బీవీస్వామి, అనగాని సత్యప్రసాద్, పయ్యావుల కేశవ్, సత్యకుమార్, గొట్టిపాటి రవికుమార్, సంధ్యారాణి సభ్యులుగా ఉంటారు. వీరందరూ గ్రామ, వార్డు సచివాలయ సిబ్బంది ప్రమోషన్లపై అధ్యయనం చేయాలని ప్రభుత్వం ఆదేశించింది.

ఈ మంత్రుల సబ్ కమిటీ కన్వీనర్‌గా గ్రామ సచివాలయాలు, వార్డు సచివాలయాల శాఖ ప్రభుత్వ కార్యదర్శి వ్యవహరిస్తారు. కమిటీ సమావేశాలను సమన్వయం చేస్తారు. ఈ మంత్రుల కమిటీ బాధ్యతలను నిర్వర్తించేందుకు అవసరమైతే ఏ ఇతర శాఖ నుండి అయినా లేదా ఏ నిపుణుడి నుండి అయినా సహాయం కోరవచ్చు.

కమిటీ విధివిధానాలు

మంత్రుల సబ్ కమిటీ వారి వారి శాఖలలో ప్రమోషన్లు ఇవ్వడానికి, మధ్యంతర పోస్టుల సృష్టిపై, వాటి విధానాలపై చర్చిస్తుంది. ఇతర శాఖలలో ప్రమోషన్లకు పరిధిని నిర్ణయిస్తుంది. వర్తించినట్లయితే మధ్యంతర పోస్టులకు పే స్కేల్‌పై నిర్ణయం తీసుకుంటుంది.

ప్రమోషన్లు ఖరారు చేయడం, మార్గనిర్దేశం చేయడం కోసం సంబంధిత శాఖలకు ఆదేశాలు జారీ చేస్తుంది. ప్రమోషన్ల తర్వాత, రేషనలైజేషన్ నియమాల ప్రకారం నిర్దేశించిన సంఖ్యలో ఫంక్షనరీలను నిర్వహించడానికి ఖాళీలను భర్తీ చేసే విధానాన్ని నిర్ణయం తీసుకుంటుంది. ప్రమోషన్ల తర్వాత ఖాళీలు భర్తీ చేసే పద్ధతిపైనా మంత్రివర్గ ఉపసంఘం చర్చిస్తుంది. ఈ మంత్రుల సబ్ కమిటీ త్వరగా నిర్ణయం తీసుకుని ప్రభుత్వానికి తన సిఫార్సులను సమర్పించాలని ఉత్తర్వుల్లో సీఎస్ పేర్కొన్నారు.