AP ICET 2026 Counselling : ఏపీ ఐసెట్ ఫైనల్ ఫేజ్ కౌన్సెలింగ్ షెడ్యూల్ విడుదల - నేటి నుంచి రిజిస్ట్రేషన్లు

AP ICET Final Phase Counselling : ఏపీ ఐసెట్-2026 చివర విడత కౌన్సెలింగ్ షెడ్యూల్ విడుదలైంది. ఎంబీఏ, ఎంసీఏ కోర్సులలో ప్రవేశాల కోసం ఆన్‌లైన్ రిజిస్ట్రేషన్లు, వెబ్ ఆప్షన్ల నమోదు ప్రక్రియ సెప్టెంబర్ 21 నుంచి ప్రారంభం కానుంది.

AP ICET Final Phase Counselling ఆంధ్రప్రదేశ్‌లోని వివిధ కళాశాలల్లో ఎంబీఏ, ఎంసీఏ కోర్సుల్లో ప్రవేశాలు పొందాలనుకునే అభ్యర్థులకు ఉన్నత విద్యామండలి కీలక సమాచారం అందించింది. ఏపీ ఐసెట్‌-2026 (AP ICET 2026) చివరి విడత కౌన్సెలింగ్‌కు సంబంధించినషెడ్యూల్‌ విడుదలైంది. రాష్ట్రవ్యాప్తంగా ఉన్న బిజినెస్ స్కూళ్లు, కంప్యూటర్ అప్లికేషన్స్ కళాశాలల్లో మిగిలిపోయిన సీట్ల భర్తీకి ఈ తుది విడత కౌన్సెలింగ్‌ను నిర్వహిస్తున్నారు.

ఏపీ ఐసెట్ 2026

ముఖ్య తేదీలు…

• అభ్యర్థులు ఈ నెల 21వ తేదీ (సెప్టెంబర్ 21, 2026) నుంచి 22వ తేదీ వరకు ఆన్‌లైన్ విధానంలో ప్రాసెస్ ఫీజు చెల్లించి రిజిస్ట్రేషన్ చేసుకోవాల్సి ఉంటుంది.
• దీనికి సంబంధించి హెల్ప్ లైన్ సెంటర్ల (HLCs) ద్వారా అప్‌లోడ్ చేసిన సర్టిఫికెట్ల ఆన్‌లైన్ పరిశీలన ప్రక్రియ సెప్టెంబర్ 21 నుంచి 23వ తేదీ వరకు కొనసాగుతుంది.
• ధ్రువపత్రాల పరిశీలన విజయవంతంగా పూర్తయిన అభ్యర్థులు తమకు కావలసిన కళాశాలలు, కోర్సులను ఎంచుకోవడానికి వెబ్ ఆప్షన్ల నమోదును సెప్టెంబర్ 21 నుంచి 23 వరకు నిర్వహించనున్నారు.
• నమోదు చేసిన ఆప్షన్లలో ఏవైనా మార్పులు లేదా చేర్పులు చేసుకోవాలనుకునే వారికి సెప్టెంబర్ 24వ తేదీన అవకాశం కల్పిస్తారు.
• ఈ ఆప్షన్ల ఆధారంగా సెప్టెంబర్ 26వ తేదీన సీట్లను కేటాయిస్తారు.
• అధికారిక వెబ్ సైట్ - https://cap.apcfss.in

రిపోర్టింగ్ తేదీలు

సీట్లు పొందిన అభ్యర్థులు సెప్టెంబర్ 28 నుంచి 30వ తేదీ వరకు ఆన్‌లైన్ ద్వారా సెల్ఫ్ జాయినింగ్ పూర్తి చేసి, కేటాయించిన కళాశాలల్లో నేరుగా రిపోర్ట్ చేయాల్సి ఉంటుంది. రాష్ట్రంలో ఎంబీఏ, ఎంసీఏ తరగతులు ఇప్పటికే ప్రారంభమైన నేపథ్యంలో, ఈ చివరి విడతలో సీట్లు సాధించిన వారు కూడా వెంటనే కళాశాలలకు హాజరుకావాలని అధికారులు స్పష్టం చేశారు. విద్యార్థులు నిర్దేశిత గడువులోగా తమ ప్రాసెస్ ఫీజు చెల్లించి, ధ్రువపత్రాల పరిశీలన ప్రక్రియను పూర్తి చేసుకోవాలని కౌన్సెలింగ్ కన్వీనర్ సూచించారు.