Road Accident : ఆగివున్న లారీని ఢీకొట్టిన కారు.. ఒకే ఫ్యామిలీలో ఐదుగురు దుర్మరణం

Road Accident In Chittoor : ఆంధ్రప్రదేశ్‌లోని చిత్తూరు జిల్లాలో ఘోర రోడ్డు ప్రమాదం జరిగింది. ఒకే కుటుంబంలో ఐదుగురు రోడ్డు ప్రమాదంలో మరణించారు.

చిత్తూరు జిల్లాలో బుధవారం ఘోరమైన రోడ్డు ప్రమాదం జరిగింది. పలమనేరు సమీపంలో జాతీయ రహదారిపై ఆగి ఉన్న లారీని.. వేగంగా వచ్చిన కారు వెనకాల నుంచి ఢీకొట్టింది. దీంతో ఈ ప్రమాదంలో ముగ్గురు మహిళలు, ఇద్దరు పురుషులు అక్కడికక్కడే చనిపోయారు. పూర్తి వివరాల్లోకి వెళ్తే..

చిత్తూరు రోడ్డు ప్రమాదం

చిత్తూరు జిల్లా గంగవరం మండలం దండపల్లి క్రాస్ వద్ద బెంగళూరు-చెన్నై జాతీయ రహదారిపై ఈ ప్రమాదం జరిగింది. ఈ ప్రమాదంలో కారు ముందుభాగం నుజ్జునుజ్జు అయింది. మృతులను కర్ణాటక వాసులుగా గుర్తించారు. మృతులు మోహన్‌దాస్, నాగరాజారావు, కుసుమ, జయంతి, పూజ.

బెంగళూరు నుంచి తిరుపతి వెళ్తుండగా ఈ ఘటన జరిగింది. ప్రమాదం గురించి తెలిసిన వెంటనే పోలీసులు ఘటన స్థలానికి చేరుకుని పరిశీలించారు. మృతదేహాలను స్థానిక ప్రభుత్వాసుపత్రికి తరలించారు. అనంతరం కేసు నమోదు చేసి దర్యాప్తు చేపట్టారు. మితిమీరిన వేగంతో ప్రయాణిస్తూ.. డ్రైవర్ నియంత్రణ కోల్పోవడంతోనే ప్రమాదం జరిగినట్టుగా తెలుస్తోంది.

తిరుపతిలో యువకుడు మృతి

మరోవైపు తిరుపతిలో అతిగా మద్యం తాగి ఓ యువకుడు కాలువలో పడి చనిపోయాడు. పోలీసులు తెలిపిన వివరాల ప్రకారం.. ఎస్టీవీ నగర్‌‌లోని ప్రధాన మురుగు కాలువలో మృతదేహం ఉన్నట్టుగా పారిశుధ్య కార్మికులు సమాచారం ఇచ్చారు. దీంతో పోలీసులు వెళ్లి పరిశీలన చేశారు.

ఆటోడ్రైవర్ దివాకర్‌గా గుర్తించారు. కొందరు స్నేహితులతో కలిసి మద్యం తాగాడు దివాకర్. తర్వాత ఇంటికి వచ్చి మద్యం కోసం డబ్బులు ఇవ్వమని భార్యతో గొడవకు దిగాడు. తర్వాత బైక్ మీద దుకాణానికి వెళ్లి మద్యం కొనుగోలు చేశాడు. మురుగు కాల్వ దగ్గరకు మూత్ర విసర్జన చేస్తూ.. కాలువలో పడిపోయి మరణించాడని ప్రాథమికంగా గుర్తించారు పోలీసులు. భార్య ఫిర్యాదు మేరకు కేసు నమోదు చేశారు. మృతదేహాన్ని పరీక్షల నిమిత్తం ఆసుపత్రికి తరలించారు. అయితే ఈ మరణంపై కొన్ని అనుమానాలు వ్యక్తం చేస్తున్నారు పోలీసులు. చొక్కా లేకుండా ఎందుకు నిలబడినట్టు, చిన్న కాలువలో ఎలా చనిపోయాడనే విషయాలపై దర్యాప్తు చేస్తున్నారు.