రాప్తాడు ఘటన: బాధిత విద్యార్థినికి ఫోన్ చేసి ధైర్యం చెప్పిన ముఖ్యమంత్రి

అనంతపురం జిల్లా రాప్తాడు జెడ్పీ హైస్కూల్‌లో దాడికి గురైన పదో తరగతి విద్యార్థినికి సీఎం చంద్రబాబు ఫోన్ చేసి ధైర్యం చెప్పారు. నిందితుడిని కఠినంగా శిక్షిస్తామని, బాధితులకు ప్రభుత్వం అండగా ఉంటుందని హామీ ఇచ్చారు. వైద్య సాయంపై ఎమ్మెల్యే పరిటాల సునీత, అధికారులతో సమీక్షించారు.

అనంతపురం జిల్లా రాప్తాడు జెడ్పీ ఉన్నత పాఠశాలలో పదో తరగతి విద్యార్థినిపై జరిగిన దారుణ దాడి ఘటన రాష్ట్రవ్యాప్తంగా తీవ్ర కలకలం రేపింది. ఈ ఘటనపై ముఖ్యమంత్రి నారా చంద్రబాబు నాయుడు శనివారం తీవ్ర దిగ్భ్రాంతి, ఆగ్రహం వ్యక్తం చేశారు. దాడికి గురైన విద్యార్థినితో పాటు ఆమె తల్లితో సీఎం ఫోన్‌లో స్వయంగా మాట్లాడి ధైర్యం చెప్పారు. బాధితులకు ప్రభుత్వం అన్ని విధాలా అండగా ఉంటుందని, నిందితుడిని తక్షణమే పట్టుకుని కఠినంగా శిక్షిస్తామని స్పష్టమైన హామీ ఇచ్చారు.

ధైర్యంగా ఉండాలి

రాప్తాడు ఘటన: బాధిత విద్యార్థినికి ఫోన్ చేసి ధైర్యం చెప్పిన ముఖ్యమంత్రి

పాఠశాల గదిలోనే విద్యార్థినిపై జరిగిన అమానుష దాడిని సీఎం చంద్రబాబు తీవ్రంగా ఖండించారు. ఫోన్ సంభాషణ సమయంలో విద్యార్థిని, ఆమె తల్లికి ధైర్యం చెప్పిన సీఎం, "ఎలాంటి భయాందోళన చెందవద్దు.. ధైర్యంగా ఉండండి. ప్రభుత్వం మీకు పూర్తి స్థాయిలో అండగా నిలుస్తుంది" అని అభయమిచ్చారు. నిందితుడిని పట్టుకుని, చట్టప్రకారం కఠిన శిక్ష పడేలా చర్యలు తీసుకోవాలని పోలీసు అధికారులను ఆదేశించారు.

ఈ దాడి ఘటనలో గాయపడిన మరొక విద్యార్థికి కూడా మెరుగైన వైద్య సేవలు అందేలా చూడాలని సంబంధిత అధికారులను సీఎం ఆదేశించారు.

ఎమ్మెల్యే పరిటాల సునీతతో సమీక్ష

బాధిత విద్యార్థినికి అందుతున్న వైద్య సహాయంపై స్థానిక ఎమ్మెల్యే పరిటాల సునీతతో ముఖ్యమంత్రి మాట్లాడారు. విద్యార్థినికి అవసరమైన అత్యుత్తమ వైద్య చికిత్స అందించాలని సూచించారు.

కాగా, పాఠశాల తరగతి గదిలోనే పాఠాలు వింటున్న విద్యార్థినిపై ఒక వ్యక్తి రంపంతో (saw) అత్యంత అమానుషంగా దాడికి పాల్పడ్డాడు. ఈ ఘటనపై అనంతపురం డిప్యూటీ సూపరింటేండెంట్ ఆఫ్ పోలీస్ (డీఎస్పీ) అశ్విన్ మణదీప్ కాకుమాను స్పందిస్తూ, "రాప్తాడు జెడ్పీ ఉన్నత పాఠశాలలో పదో తరగతి విద్యార్థినిపై తరగతి గదిలోనే దారుణ దాడి జరిగినట్లు సమాచారం వచ్చింది. ఒక వ్యక్తి రంపంతో విద్యార్థినిపై దాడికి తెగబడ్డాడు" అని ధ్రువీకరించారు.

సమాజంలో చోట లేదు - ఎక్స్ వేదికగా ఆగ్రహం

"రాప్తాడు జెడ్పీ ఉన్నత పాఠశాల తరగతి గదిలోనే పదో తరగతి విద్యార్థినిపై జరిగిన అమానుష దాడి నన్ను తీవ్రంగా కలిచివేసింది. తీవ్ర ఆగ్రహానికి గురిచేసింది. బడుల్లో మన ఆడపిల్లలను లక్ష్యంగా చేసుకునే దాడికోరులకు మన సమాజంలో ఏమాత్రం చోటు లేదు" అని సీఎం ఎక్స్ లో పేర్కొన్నారు. నిందితుడిని వేగంగా వేటాడి పట్టుకోవాలని, చట్టం ప్రకారం అత్యంత కఠినమైన శిక్ష పడేలా చూడాలని పోలీసులను ఆదేశించినట్లు తెలిపారు.