కాశీబుగ్గ తొక్కిసలాట ఘటనలోని మృతుల కుటుంబాలకు పరిహారం అందజేత

ఆంధ్రప్రదేశ్‌లోని శ్రీకాకుళం కాశీబుగ్గలో తొక్కిసలాట జరిగి 9 మంది మరణించిన విషయం తెలిసిందే. బాధిత కుటుంబాలకు ప్రభుత్వం పరిహారం అందజేసింది.

ఏపీలోని శ్రీకాకుళం జిల్లా కాశీబుగ్గ వెంకటేశ్వరస్వామి ఆలయంలో శనివారం తొక్కిసలాట జరిగింది. ఈ ఘటనలో 9 మంది మరణించారు. ఇందులో ఒక బాలుడు, 8 మంది మహిళలు ఉన్నారు. 25 మందికి తీవ్ర గాయాలు అయ్యాయి. కార్తీక ఏకాదశి సందర్భంగా దర్శనానికి భక్తులు భారీ సంఖ్యలో రావడంతో ఈ ఘటన జరిగింది. మృతుల కుటుంబాలకు మంత్రి నారా లోకేశ్ పరిహారం ప్రకటించారు. మృతుల కుటుంబాలకు 15 లక్షలు, అలాగే క్షతగాత్రులకు రూ.3 లక్షల ఆర్థిక సాయం ప్రకటించారు. శనివారం ఘటన స్థలానికి వెళ్లి పరిశీలించారు. బాధితులకు అండగా ఉంటామని భరోసా ఇచ్చారు.

కాశీబుగ్గ మృతుల కుటుంబాలకు పరిహారం అందజేత

తొక్కిసలాట జరిగి మృతి చెందిన వారి కుటుంబాలకు ప్రభుత్వం తాజాగా పరిహారం అందజేసింది. టెక్కలి నియోజకవర్గం పరిధిలోని నందిగాం మండలం పిట్టలిసరియా, రామేశ్వరం, శివరాంపురం గ్రామానికి చెందిన మృతుల కుటుంబాలకు రూ.15 లక్షల చొప్పున పరిహారాన్ని కేంద్రమంత్రి రామ్మోహన్‌నాయుడు, రాష్ట్ర మంత్రి అచ్చెన్నాయుడు అందజేశారు.

తొక్కిసలాట ఘటన తీవ్రంగా కలిచివేసిందని మంత్రి అచ్చెన్నాయుడు అన్నారు. మృతుల కుటుంబాలకు అండగా ఉంటామని అన్నారు. ఇలాంటి ఘటనలు మళ్లీ జరగకుండా చర్యలు తీసుకుంటామని చెప్పారు.

ప్రధాని మోదీ కూడా రూ.2 లక్షల ఆర్థిక సాయం ప్రకటించిన విషయం తెలిసిందే. ఈ సాయం త్వరలో అందుతుందని రామ్మోహన్‌నాయుడు చెప్పారు. దైర్యంగా ఉండాలని కేంద్ర, రాష్ట్ర ప్రభుత్వాలు అండగా ఉంటాయన్నారు.

తొక్కిసలాట ఘటనపై వైసీపీ రాజకీయం చేస్తోందని మంత్రి సంధ్యారాణి అన్నారు. ఈ ఘటనపై రాజకీయాలు చేయడం దుర్మార్గమన్నారు. వైసీపీ చర్యలు ప్రజాస్వామ్య విలువలు, మానవత్వానికి విరుద్ధమన్నారు. తొక్కిసలాట ఘటనపై ప్రభుత్వం విచారణకు ఆదేశించిందన్నారు. దు:ఖంలో ఉన్న కుటుంబాలపై వైసీపీ అనవసర ప్రచారాలు చేయడం దారుణం అని అన్నారు.

తొక్కిసలాట ఘటన స్థలాన్ని దేవాదాయ శాఖ మంత్రి ఆనం రామనారాయణరెడ్డి పరిశీలించారు. స్థానిక ఆసుపత్రిలో చికిత్స పొందుతున్న బాధితులను కలిసి మాట్లాడారు. మెరుగైన వైద్యం అందించాలని ఆదేశించారు. బాధితులకు అండగా ఉంటామని భరోసా ఇచ్చారు.