ఏపీకి తుపాను ముప్పుతో రెడ్ అలర్ట్, స్కూళ్లకు సెలవు.. తెలంగాణలోనూ భారీ వర్షాలు!

ఆంధ్రప్రదేశ్‌లో జోరుగా వానలు పడనున్నాయి. తుపాను కారణంగా రాష్ట్రానికి రెడ్ అలర్ట్ ప్రకటించింది వాతావరణ శాఖ. మరోవైపు తెలంగాణ రాష్ట్రంలోనూ వర్షాలు కురవనున్నాయి.

తెలుగు రాష్ట్రాల్లో వర్షాలు దంచికొట్టనున్నాయి. ఏపీకి తుపాను ముప్పు పొంచి ఉంది. దీని ప్రభావం తెలంగాణలోనూ ఉండనుంది. ముంథా తుపాను ఆంధ్రప్రదేశ్‌లో తీరం దాటే అవకాశం ఉంది. ఈ కారణంగా వాతావరణ శాఖ రాష్ట్రానికి రెడ్ అలర్ట్ జారీ చేసింది. ఈ నెల 28వ తేదీన తీవ్రమైన తుపానుగా కాకినాడ దగ్గర తీరం దాటే అవకాశం ఉందని ఐఎండీ హెచ్చరించింది. నేటి నుంచి అక్టోబర్ 28వ తేదీ దాగా రాష్ట్రంలో తుపాను ప్రభావం భారీగా ఉండనుంది.

ఏపీకి తుపాను ప్రభావం

తుపాను తీరం దాటే సమయంలో గంటకు 90 నుంచి 110 కిలో మీటర్ల వేగంతో గాలులు వీస్తాయి. రాష్ట్రవ్యాప్తంగా తుపాను ప్రభావం కనిపించనుంది. తీర ప్రాంతంలోని విద్యా సంస్థలకు 28, 29వ తేదీల్లో సెలవులు ప్రకటించాలని వాతావరణ శాఖ సూచించింది. తీర ప్రాంత ప్రజలకు అప్రమత్తంగా ఉండాలని అధికారులు హెచ్చరికలు జారీ చేశారు.

అక్టోబర్ 28 సాయంత్రం లేదా రాత్రి సమయంలో ఈ తుపాను కాకినాడ సమీపంలోని మచిలీపట్నం, కళింగపట్నం మధ్య దాటుతుందని, గాలుల వేగం గంటకు 90-100 కి.మీ.లకు చేరుకుంటుందని ఐఎండీ తెలిపింది. కోస్తా ఆంధ్రప్రదేశ్, యానాంలలో ఇప్పటికే తేలికపాటి నుండి మోస్తరు వర్షాలు ప్రారంభమయ్యాయి. రాబోయే ఐదారు రోజులు ఇలాగే కొనసాగే అవకాశం ఉంది. మత్స్యకారులు సముద్రంలోకి వెళ్లవద్దని అధికారులు సూచించారు. అక్టోబర్ 27, 28 తేదీలలో రాయలసీమలో అతి భారీ వర్షాలు కురుస్తాయని IMD హెచ్చరించింది.

తెలంగాణలో వర్షాలు

బంగాళాఖాతంలో ఏర్పడిన అల్పపీడనం తుపానుగా మారే అవకాశం ఉన్నందున అక్టోబర్ 27 నుండి 29 వరకు తెలంగాణలోని పలు ప్రాంతాల్లో భారీ వర్షాలు కురుస్తాయని భారత వాతావరణ శాఖ అంచనా వేసింది. అక్టోబర్ 27, 28 తేదీల్లో అతి భారీ వర్షాలు పడనున్నాయి. రాష్ట్రంలోని దక్షిణ, తూర్పు జిల్లాలపై దీని ప్రభావం ఎక్కువగా ఉంటుందని, హైదరాబాద్‌లో తేలికపాటి నుండి మోస్తరు వర్షాలు మాత్రమే కురిసే అవకాశం ఉంది.