E-Paper
Andhra Pradesh Cyclone Alert : ఏపీకి తుపాను ముప్పు - ఈ తేదీల్లో భారీ నుంచి అతి భారీ వర్షాలు..!
బంగాళాఖాతంలోని అల్పపీడనం రూపాంతరం చెంది సోమవారానికి తుపానుగా మారనుంది. బుధవారం నాటికి కోస్తాంధ్ర తీరానికి చేరుకోనున్న నేపథ్యంలో మత్స్యకారులకు, ప్రజలకు ఏపీ విపత్తుల నిర్వహణ సంస్థ హెచ్చరికలు జారీ చేసింది.
Prefer HTon Google
బంగాళాఖాతంలో వాతావరణ మార్పులు వేగంగా చోటుచేసుకుంటున్నాయి. తూర్పుమధ్య బంగాళాఖాతంలో ఏర్పడిన తీవ్ర అల్పపీడనం ప్రస్తుతం అల్పపీడనంగా స్థిరపడింది. ఈ వ్యవస్థ మరింత బలపడి తీవ్ర రూపం దాల్చుతోందని భారత వాతావరణ శాఖ పేర్కొంది.
తుపానుగా మారే ఛాన్స్….
ప్రస్తుతం కేంద్రీకృతమైన ఈ అల్పపీడనం శనివారం రాత్రి నాటికి అదే ప్రాంతంలో వాయుగుండంగా మారనుంది. తదనంతరం ఇది మరింత తీవ్రమై, ఆదివారం నాటికి తీవ్ర వాయుగుండంగా రూపం దాలుస్తుందని అధికారులు అంచనా వేస్తున్నారు. ఈ క్రమంలో ప్రయాణిస్తూ సోమవారం ఉదయానికి పశ్చిమమధ్య బంగాళాఖాతం పరిధిలోకి చేరుకుని పూర్తిస్థాయి తుపానుగా (Cyclone) మారే అవకాశముంది. తుపానుగా రూపాంతరం చెందిన తర్వాత ఇది మరింత ముందుకు కదులుతూ బుధవారం ఉదయానికి కోస్తాంధ్ర తీరానికి చేరుకునే అవకాశం ఉందని వాతావరణ శాఖ స్పష్టం చేసింది.
భారీ నుంచి అతిభారీ హెచ్చరికలు
ఈ తుపాను ప్రభావంతో ఆంధ్రప్రదేశ్ వ్యాప్తంగా వాతావరణంలో గణనీయమైన మార్పులు రానున్నాయి. సోమవారం నుంచి రాష్ట్రంలో విస్తారంగా వర్షాలు ప్రారంభమవుతాయి. ముఖ్యంగా మంగళవారం, బుధవారాల్లో కోస్తాంధ్రలోని పలు జిల్లాల్లో భారీ నుంచి అతిభారీ వర్షాలు కురిసే అవకాశం ఉంది. ఈ నేపథ్యంలో తీరప్రాంత జిల్లాల యంత్రాంగాన్ని ప్రభుత్వం ఇప్పటికే అప్రమత్తం చేసింది.
తుపాను తీవ్రత దృష్ట్యా తీరం వెంబడి గంటకు భారీ వేగంతో ఈదురుగాలులు వీచే అవకాశముంది. సముద్రం తీవ్ర అల్లకల్లోలంగా మారనున్నందున మత్స్యకారులు ఎవరూ సముద్రంలోకి వేటకు వెళ్లకూడదని అధికారులు కచ్చితమైన ఆదేశాలు జారీ చేశారు. ఇప్పటికే వేటకు వెళ్లిన వారు తక్షణమే సమీప సురక్షిత తీరాలకు తిరిగిరావాలని సూచించారు.
ప్రకృతి విపత్తుల వేళ సోషల్ మీడియా వేదికగా ప్రచారమయ్యే అసత్య వార్తలు, రూమర్లను ప్రజలు తీవ్రంగా పరిగణించవద్దని అధికారులు విజ్ఞప్తి చేశారు. అన్-వెరిఫైడ్ సందేశాలను ఇతరులకు షేర్ చేయకూడదని కోరారు. "ప్రజలు ఎప్పటికప్పుడు విపత్తుల నిర్వహణ సంస్థ, ఆర్‌టీజీఎస్ (RTGS), భారత వాతావరణ శాఖ ఇచ్చే అధికారిక సమాచారాన్ని మాత్రమే నమ్మాలి. లోతట్టు ప్రాంత ప్రజలు ముందస్తు జాగ్రత్త చర్యలు తీసుకోవాలి" అని ఏపీ విపత్తుల నిర్వహణ విభాగం స్పష్టం చేసింది.
