E-Paper
Andhra Pradesh Cyclone Alert : వాతావరణశాఖ బిగ్ అలర్ట్ - ఆంధ్రప్రదేశ్ వైపు మరో తుఫాన్..!
Andhra Pradesh Cyclone Alert : ఆగ్నేయ బంగాళాఖాతంలో అల్పపీడనం వేగంగా బలపడుతోంది. రాబోయే 6 గంటల్లో వాయుగుండంగా, ఆదివారం సాయంత్రానికి తుపానుగా మారనుంది. సోమవారం నాటికి ఏపీ తీరానికి చేరనుండటంతో హెచ్చరికలు జారీ చేశారు.
Prefer HTon Google
Andhra Pradesh Cyclone Alert : ఆగ్నేయ బంగాళాఖాతం, దానికి ఆనుకుని ఉన్న అండమాన్ సముద్ర ప్రాంతాల్లో ఏర్పడిన అల్పపీడనం అత్యంత వేగంగా బలపడుతోందని వాతావరణ శాఖ వెల్లడించింది. ఇది రాబోయే 6 గంటల వ్యవధిలోనే పశ్చిమ-వాయువ్య దిశగా పయనించి వాయుగుండంగా మారే అవకాశం ఉంది. ఆ తర్వాత మరింత తీవ్రరూపం దాల్చి… ఆదివారం సాయంత్రానికి తుపానుగా మారనుందని హెచ్చరించింది.
సోమవారం నాటికి తీరం సమీపంలోకి..
ఈ తుఫాన్ సోమవారం సాయంత్రానికి పశ్చిమమధ్య బంగాళాఖాతం మీదుగా ఆంధ్రప్రదేశ్ తీరానికి సమీపంలోకి చేరుకుంటుందని అంచనా వేస్తున్నారు. దీని ప్రభావం వల్ల సోమవారం, మంగళవారాల్లో రాష్ట్రవ్యాప్తంగా వాతావరణం మారనుంది. ముఖ్యంగా సెంట్రల్ ఆంధ్రా (మధ్య కోస్తా), రాయలసీమ జిల్లాల్లో పలుచోట్ల ఈదురుగాలులతో కూడిన తీవ్ర వర్షపాతం నమోదయ్యే అవకాశం ఉంది.
కొన్ని ప్రాంతాల్లో భారీ నుండి అతి భారీ వర్షాలు కురిసే అవకాశం ఉందని అధికారులు స్పష్టం చేశారు. తుపాను తీరం సమీపానికి వచ్చే సమయంలో తీరం వెంబడి గంటకు 45 నుంచి 65 కిలోమీటర్ల వేగంతో ప్రచండ ఈదురుగాలులు వీచే ప్రమాదం ఉంది.
మత్స్యకారులకు హెచ్చరికలు…
పరిస్థితి తీవ్రతను బట్టి ప్రజలందరూ ముందస్తు జాగ్రత్తలు తీసుకోవాలని ఆంధ్రప్రదేశ్ రాష్ట్ర విపత్తుల నిర్వహణ సంస్థ (APSDMA) మేనేజింగ్ డైరెక్టర్ ప్రఖర్ జైన్ విజ్ఞప్తి చేశారు. ముఖ్యంగా సముద్రం తీవ్ర అలజడిగా ఉంటుందున మత్స్యకారులు ఎట్టి పరిస్థితుల్లోనూ వేటకు వెళ్లరాదని కఠినంగా ఆదేశించారు. ఇప్పటికే వేటకు వెళ్లిన వారు తక్షణమే సమీప తీరాలకు తిరిగి రావాలని సూచించారు.
లోతట్టు ప్రాంతాల ప్రజలు అప్రమత్తంగా ఉండాలని, వర్షాలు తీవ్రమయ్యే అవకాశం ఉన్నందున అవసరమైతే అధికారులు ఏర్పాటు చేసే పునరావాస కేంద్రాలకు తరలివెళ్లేందుకు సిద్ధంగా ఉండాలని ఆయన కోరారు. ఉరుములు, మెరుపులు, ఈదురుగాలులు వీస్తున్న సమయంలో చెట్ల కింద, విద్యుత్ స్తంభాల వద్ద నిలబడకూడదని సూచించారు.
