Araku Tour Package : హాలిడేస్ లో అరకు వెళ్లొస్తారా..? IRCTC అదిరిపోయే వన్ డే టూర్ ప్యాకేజీ, ఇవిగో వివరాలు

IRCTC Araku Tour Package : దసరా సెలవుల వేళ విశాఖపట్నం నుంచి అరకు లోయ అందాలను సందర్శించేందుకు ఐఆర్‌సీటీసీ టూరిజం 'అరకు రైల్ కమ్ రోడ్ ప్యాకేజీ'ని అందుబాటులోకి తెచ్చింది. ఒక్కరోజులోనే పూర్తయ్యే ఈ ప్రత్యేక ప్యాకేజీ వివరాలు, టికెట్ ధరలు, ప్రయాణ షెడ్యూల్ వివరాలను ఇక్కడ తెలుసుకోండి.

IRCTC Araku Tour Package : దసరా సెలవుల వేళ కుటుంబంతో కలిసి ఆహ్లాదకరమైన ప్రదేశానికి వెళ్లాలని భావిస్తున్నారా? పచ్చని కొండకోనలు, జలపాతాల జలసరిగాలు, వీనులవిందైన వాతావరణం, సువాసనలు వెదజల్లే కాఫీ తోటలతో పర్యాటకులను పరవశింపజేసే అరకు లోయ పర్యటనకు ఐఆర్‌సీటీసీ టూరిజం ఒక అద్భుతమైన అవకాశాన్ని ముందుకు తీసుకొచ్చింది.

వైజాగ్ - అరకు టూర్ ప్యాకేజీ

విశాఖపట్నం నుంచి రోజూ అందుబాటులో ఉండేలా 'అరకు రైల్ కమ్ రోడ్ ప్యాకేజీ' పేరుతో ఈ వన్ డే టూర్ ఆఫర్‌ను అందిస్తోంది. ఈ దసరా పండుగ సీజన్‌లో అక్టోబర్ 10వ తేదీన జర్నీ ఉంటుంది. ఈ ప్యాకేజీలో భాగంగా అరకు అందాలను కేవలం ఒక్క రోజు వ్యవధిలోనే వీక్షించేలా ఈ ప్యాకేజీని రూపొందించారు. విశాఖపట్నం రైల్వే స్టేషన్ నుంచి ప్రారంభమయ్యే ఈ యాత్రలో రైలు ప్రయాణ అనుభూతితో పాటు సుందరమైన ఘాట్ రోడ్డు ప్రయాణం కూడా పర్యాటకులకు లభిస్తుంది.

టూర్ షెడ్యూల్ ఇలా….

• ఉదయం 07:00 గంటలకు విశాఖపట్నం రైల్వే స్టేషన్ నుంచి రైలు (Train No. 58501) బయలుదేరుతుంది. ప్రకృతి అందాలను ఆస్వాదిస్తూ ఉదయం 11:00 గంటలకు అరకు చేరుకుంటారు.
• అరకు చేరుకున్న తర్వాత…. మొదట గిరిజన సంస్కృతికి అద్దంపట్టే ట్రైబల్ మ్యూజియం , అనంతరం అందమైన పద్మాపురం గార్డెన్స్ సందర్శన ఉంటుంది.
• రుచికరమైన మధ్యాహ్న భోజనం ముగించుకుని…. రోడ్డు మార్గాన విశాఖకు తిరుగు ప్రయాణం ప్రారంభమవుతుంది. మార్గమధ్యంలో ప్రసిద్ధ అనంతగిరి కాఫీ తోటలు , గాలికొండ వ్యూ పాయింట్ , అద్భుతమైన బొర్రా గుహలను (Borra Caves) సందర్శిస్తారు.
• రాత్రికి పర్యాటకులను సురక్షితంగా విశాఖపట్నం రైల్వే స్టేషన్ వద్ద దించి టూర్ ముగిస్తారు.

ఈ లింక్ పై క్లిక్ చేసి ఈ ప్యాకేజీ టికెట్ ధరలతో పాటు మరిన్ని వివరాలను తెలుసుకోవచ్చు…