E-Paper
పాదయాత్ర అంటూ మళ్లీ వస్తాడు జాగ్రత్త.. జగన్పై మాజీ మంత్రి కామినేని కామెంట్స్
మాజీ ముఖ్యమంత్రి వైఎస్ జగన్ మోహన్ రెడ్డిపై ఎమ్మెల్యే కామినేని శ్రీనివాస్ విమర్శలు గుప్పించారు. జగన్ కేవలం తన స్వలాభం, సొంత అజెండాతోనే వ్యవహరిస్తుంటారని తీవ్రంగా విమర్శించారు.
వైసీపీ అధినేత జగన్ మోహన్ రెడ్డికి సొంత అజెండా తప్ప.. రాష్ట్ర ప్రయోజనాలతో పని లేదని మాజీ మంత్రి, ఎమ్మెల్యే కామినేని శ్రీనివాస్ విమర్శలు గుప్పించారు. జగన్ అధికారంలో లేనప్పుడు ప్రజల్లోకి వస్తూ పాదయాత్రల పేరిట హామీలు ఇస్తారని, తీరా అధికారంలోకి వచ్చాక అంతఃపురం దాటి బయటకు రారని కామినేని శ్రీనివాస్ ఎద్దేవా చేశారు.
రాష్ట్రంలో జరుగుతున్న ప్రతి మంచి పనికి, అభివృద్ధి కార్యక్రమాలకు తనదే క్రెడిట్ అని చెప్పుకోవడానికి జగన్ ప్రయత్నిస్తున్నారని కామినేని విమర్శించారు. గూగుల్ డేటా సెంటర్, భోగాపురం విమానాశ్రయం వంటి ప్రాజెక్టులను కూడా తానే తెచ్చానని చెప్పుకుంటున్నారని పేర్కొన్నారు.
మెరిట్ సాధించి డీఎస్సీ ద్వారా ఉద్యోగాలు పొందిన 16 వేల మందికి అవమానం జరిగేలా జగన్ అభూత కల్పనలతో ప్రచారం చేస్తున్నారన్నారు. వైఎస్సార్సీపీ శ్రేణులే దీనిపై అనవసర రగడ సృష్టిస్తున్నాయని ఆరోపించారు. ఇందులో డీఎస్సీ, జెన్ జీవాళ్లు నిరసనల్లో ఎవరూ లేరని కామినేని అన్నారు.
దేశంలోని అన్ని రాజకీయ పార్టీలు అమరావతికే మద్దతు తెలపగా, జగన్ మాత్రం ఇప్పటికీ మూడు రాజధానుల ముసుగులో అభివృద్ధిని అడ్డుకునే యత్నం చేస్తున్నారని ఆగ్రహం వ్యక్తం చేశారు. మూడు రాష్ట్రాలు అనేది ఒక్క జగన్కి మాత్రమే నచ్చుతుందని, దేశంలో ఎవరికీ నచ్చడం లేదని ఆరోపించారు. భారతదేశంలోని ప్రతీ పార్టీ అమరావతికి మద్దతు తెలుపుతుందన్నారు.
అభివృద్ధి కార్యక్రమాలకు అడ్డుపడే క్రమంలో కోర్టుల్లో వందలాది కేసులు వేస్తున్నారని, సుప్రీంకోర్టు, హైకోర్టుల నుంచి పలుమార్లు మొట్టికాయలు తిన్నా ఆయన తీరు మారలేదని కామినేని ధ్వజమెత్తారు. ప్రభుత్వం చేసే అభివృద్ధి కార్యక్రమాలకు అడ్డుపడుతున్నారన్నారు.
రాష్ట్ర భవిష్యత్తును, మన పిల్లల భవిష్యత్తును కాపాడుకోవాల్సిన బాధ్యత ప్రజలపైనే ఉందని, ప్రతి ఒక్కరూ ఆలోచించి ప్రస్తుత ప్రభుత్వానికి మద్దతుగా నిలవాలని ఈ సందర్భంగా కామినేని పిలుపునిచ్చారు. మళ్లి అవకాశం కోసం పాదయాత్ర అంటూ వస్తున్నారని, జగన్ను నమ్మకూడదని పేర్కొన్నారు.
