AP Bharosa Pension : ఏపీ పింఛన్ దారులకు అలర్ట్ - 1వ తేదీన ఉద‌యం నుంచే డబ్బుల పంపిణీ

AP NTR Bharosa Pension Distribution : ఆంధ్రప్రదేశ్‌లో ఎన్టీఆర్ భరోసా పింఛన్లను అక్టోబర్ 1వ తేదీ ఉదయం 6:30 గంటల నుంచే లబ్ధిదారుల ఇళ్ల వద్ద పంపిణీ చేయనున్నారు. ప్రభుత్వం ఇప్పటికే రూ.2,692.34 కోట్లను విడుదల చేసింది.

AP NTR Bharosa Pension Distribution : భరోసా పింఛనుదారులకు రాష్ట్ర ప్రభుత్వం తీపి కబురు చెప్పింది. గతంలో ప్రకటించిన సవరించిన వేళలతో సంబంధం లేకుండా…. ఎప్పటిలాగే అక్టోబర్ 1వ తేదీ ఉదయం 6:30 గంటల నుంచే లబ్ధిదారుల ఇంటి వద్దకే వచ్చి పింఛన్ల నగదును అందజేయనున్నట్లు ప్రభుత్వం స్పష్టం చేసింది. ఈ మేరకు మంత్రి కొండపల్లి శ్రీనివాస్ సోమవారం ప్రకటన విడుదల చేశారు.

ఏపీ పింఛన్లు

ఉదయం నుంచే పంపిణీ….

బ్యాంకు ఉద్యోగులు తమ సమ్మెను విరమించడంతో బ్యాంకింగ్ కార్యకలాపాలకు ఎలాంటి ఆటంకం కలగలేదని మంత్రి వివరించారు. దీంతో ముందస్తు ప్రణాళిక ప్రకారమే పింఛన్ల పంపిణీకి అవసరమైన అన్ని ఏర్పాట్లను అధికార యంత్రాంగం వేగవంతం చేసింది. సెప్టెంబర్ 30వ తేదీనే స్వర్ణ గ్రామం, స్వర్ణ వార్డు సిబ్బంది బ్యాంకుల నుంచి 100 శాతం పింఛను నగదును విత్‌డ్రా చేసుకుంటారని… అక్టోబర్ 1వ తేదీ తెల్లవారుజాము నుంచే లబ్ధిదారుల ఇళ్లకు వెళ్లి నేరుగా నగదు అందజేస్తారని తెలిపారు.

అక్టోబర్ నెలకు సంబంధించిన పింఛన్ల పంపిణీ కోసం రాష్ట్ర ప్రభుత్వం ఇప్పటికే రూ.2,692.34 కోట్లను విడుదల చేసింది. ఈ మొత్తం నిధుల్లో రూ.2,692.28 కోట్లను నేరుగా పంచాయతీ, వార్డుల ఖాతాలకు జమ చేశారు. మిగిలిన రూ. 6 లక్షలను విజయనగరం జిల్లా గజపతినగరం మండలంలోని ఎన్‌ఎస్ఏపీ పింఛనుదారుల ఖాతాలకు డిజిటల్ పద్ధతిలో నేరుగా జమ చేయనున్నారు.

పక్కాగా ఏర్పాట్లు – అధికారులకు ఆదేశాలు

సెప్టెంబర్ 30వ తేదీ నాటికే పంపిణీకి కావలసిన పూర్తి నగదు సిద్ధంగా ఉండేలా చర్యలు తీసుకోవాలని అధికారులను మంత్రి ఆదేశించారు. జిల్లా ప్రాజెక్టు డైరెక్టర్లు, ఎంపీడీవోలు, మున్సిపల్ కమిషనర్లు, రాష్ట్ర స్థాయి బ్యాంకర్ల సమితి మరియు బ్యాంకు అధికారులతో నిరంతరం సమన్వయం చేసుకోవాలని సూచించారు. రాష్ట్రంలోని 61.80 లక్షల మంది పింఛనుదారులకు ప్రతి నెలా 1వ తేదీనే వేళకు పింఛన్లు అందించే బాధ్యతను తమ ప్రభుత్వం ఎంతో ప్రతిష్టాత్మకంగా తీసుకుందని మంత్రి కొండపల్లి శ్రీనివాస్ స్పష్టం చేశారు.