జులై చివరిలో భోగాపురం విమానాశ్రయాన్ని ప్రారంభించనున్న ప్రధాని మోదీ!

ఆంధ్రప్రదేశ్‌లోని భోగాపురం అంతర్జాతీయ విమానాశ్రయాన్ని 2026 జులై చివరి నాటికి ప్రధాన మంత్రి నరేంద్ర మోదీ ప్రారంభించనున్నారు. ఈ విషయాన్ని కేంద్ర పౌర విమానయాన శాఖ మంత్రి రామ్మోహన్ నాయుడు వెల్లడించారు.

ఏపీలోని భోగాపురం ఇంటర్నేషనల్ ఎయిర్‌పోర్ట్ ప్రారంభానికి సిద్ధమైంది. జులై చివరిలో ప్రధాని మోదీ ప్రారంభించనున్నారు. విమానాశ్రయ ప్రాంగణంలో విజయనగరం కలెక్టర్ రామ్‌సుందర్ రెడ్డి, ఉన్నతాధికారులు, జీఎంఆర్ అంతర్జాతీయ విమానాశ్రయ ప్రతినిధులతో రామ్మోహన్ నాయుడు సమీక్షా సమావేశం నిర్వహించారు. ప్రయాణికుల కోసం లాంజ్, ఇతర ప్రాంతాలలో కల్పించిన సౌకర్యాల పట్ల ఆయన సంతృప్తి వ్యక్తం చేశారు. అన్ని చట్టపరమైన తనిఖీలు, పరీక్షలు పూర్తయ్యాయని, విమానాశ్రయం పూర్తిస్థాయి కార్యకలాపాలకు సిద్ధంగా ఉందని అధికారులు ఆయనకు వివరించారు. విమానాశ్రయానికి సులభంగా చేరుకునేందుకు అనువైన రహదారులు (అప్రోచ్ రోడ్లు), ఇతర సౌకర్యాలు కల్పించామని కలెక్టర్ మంత్రికి తెలిపారు.

భోగాపురం ఎయిర్‌పోర్ట్

రాష్ట్ర ప్రభుత్వం కేటాయించిన 2,200 ఎకరాల స్థలంలో జీఎంఆర్ గ్రూప్ సుమారు రూ.4,500 కోట్ల అంచనా వ్యయంతో ఈ విమానాశ్రయాన్ని నిర్మించింది. ప్రస్తుతం ఉన్న విశాఖపట్నం విమానాశ్రయం నుండి ఇది సుమారు 60 కిలోమీటర్ల దూరంలో ఉంది. కొత్త విమానాశ్రయానికి వేగంగా చేరుకునేందుకు వీలుగా విశాఖపట్నం బీచ్ మీదుగా భోగాపురం వరకు రాష్ట్ర ప్రభుత్వం ఒక ప్రత్యేక రహదారిని నిర్మించింది.

విశాఖపట్నం-శ్రీకాకుళం జాతీయ రహదారిపై ఉండటం, విజయనగరానికి అత్యుత్తమ రవాణా అనుసంధానాన్ని కల్పించడం వల్ల, ఈ అంతర్జాతీయ విమానాశ్రయం ఉత్తరాంధ్ర ప్రాంతంలో ఆర్థిక కార్యకలాపాలను వేగవంతం చేస్తుందని రామ్మోహన్ నాయుడు పేర్కొన్నారు.

విమానాశ్రయ ఆర్థిక సాధ్యత, ఇతర అంశాలను క్షుణ్ణంగా పరిశీలించిన తర్వాతే యూజర్ డెవలప్‌మెంట్ ఫీజును నిర్ణయించినట్లు ఆయన తెలిపారు. విమానాశ్రయాల ఆర్థిక నియంత్రణ మండలి (AERA), జీఎంఆర్ గ్రూప్‌ను దేశీయ విమాన ప్రయాణాలకు బయలుదేరే వారి నుండి రూ.835, వచ్చే వారి నుండి రూ.355, అలాగే అంతర్జాతీయ ప్రయాణాలకు బయలుదేరే వారి నుండి రూ.1,255, వచ్చే వారి నుండి రూ.545 వసూలు చేయడానికి అనుమతించింది. భారతదేశంలోని ఇతర విమానాశ్రయాలతో పోలిస్తే ఈ యూడీఎఫ్ అత్యధికంగా ఉన్నందున, దీనిని తగ్గించాలని విమాన ప్రయాణికుల సంఘాలు ప్రభుత్వాన్ని కోరుతున్నాయి.

నిజానికి భోగాపురం ఎయిర్‌పోర్ట్ ప్రారంభోత్సవ తేదీ పలుమార్లు మారింది. రాష్ట్ర ప్రభుత్వం జులై 5వ తేదీని ప్రతిపాదించినప్పటికీ, ఆ తేదీన ప్రారంభోత్సవం జరగలేదు. ఆ తర్వాత సోషల్ మీడియాలో జులై 26వ తేదీ గురించి చర్చ జరిగింది, కానీ ఆ తేదీని ఖరారు చేయలేదని అధికారులు చెబుతున్నారు. ప్రధాన మంత్రి కార్యాలయం ఇంకా తేదీని ఖరారు చేయనప్పటికీ, త్వరలోనే కొత్త తేదీని ప్రకటిస్తారని తెలుగుదేశం పార్టీ వర్గాలు చెబుతున్నాయి. కేంద్ర విమానయాన మంత్రి మంత్రి రామ్మోహన్ నాయుడు కూడా జులై చివరిలో ప్రారంభిస్తామని చెప్పారు.