సికింద్రాబాద్ - విశాఖ వందే భారత్ ట్రైన్ అప్డేట్... ఆలస్యంగా బయల్దేరనున్న రైలు! రీషెడ్యూల్ టైమింగ్స్ ఇలా

హైదరాబాద్‌లోని సికింద్రాబాద్ నుంచి నుంచి విశాఖపట్నం మధ్య రాకపోకలు సాగించే వందే భారత్ ఎక్స్‌ప్రెస్ ప్రయాణికులకు దక్షిణ కోస్తా రైల్వే కీలక సూచనలు చేసింది. ఇవాళ సికింద్రాబాద్ నుంచి బయల్దేరాల్సిన రైలు వేళల్లో మార్పు చేసినట్లు ప్రకటించింది.

తెలుగు రాష్ట్రాల మీదుగా ప్రయాణించే పలు కీలక ఎక్స్‌ప్రెస్ రైళ్ల వేళల్లో మార్పులు చోటుచేసుకున్నాయి. ప్రయాణికుల సౌకర్యార్థం సవరించిన వేళల ప్రకారం రైళ్లను నడుపుతున్నట్లు దక్షిణ కోస్తా రైల్వే ప్రకటించింది. సికింద్రాబాద్ నుంచి విశాఖపట్నం వెళ్లే వందే భారత్ ఎక్స్‌ప్రెస్‌తో పాటు బెంగళూరు నుంచి బయలుదేరే రెండు ప్రధాన రైళ్ల బయలుదేరే సమయాలను శనివారం (12-09-2026) రోజున రీషెడ్యూల్ చేశారు.

వందే భారత్ ఎక్స్ ప్రెస్

1. సికింద్రాబాద్ - విశాఖపట్నం వందే భారత్ (ట్రెయిన్ నెం. 20834):

సికింద్రాబాద్ నుంచి విశాఖపట్నం వెళ్లే వందే భారత్ ఎక్స్‌ప్రెస్ రైలు సాధారణంగా మధ్యాహ్నం 15:00 గంటలకు (మధ్యాహ్నం 3:00 గంటలకు) సికింద్రాబాద్ స్టేషన్ నుంచి బయలుదేరాల్సి ఉంది. కానీ…. సవరించిన వేళల ప్రకారం నేడు (12-09-2026) ఈ రైలు సాయంత్రం 17:45 గంటలకు (సాయంత్రం 5:45 గంటలకు) బయలుదేరుతుంది. అంటే నిర్ణీత సమయం కంటే దాదాపు 2 గంటల 45 నిమిషాలు ఆలస్యంగా ఈ రైలు పరుగులు తీయనుంది.

2. బెంగళూరు - భువనేశ్వర్ ప్రశాంతి ఎక్స్‌ప్రెస్ (ట్రెయిన్ నెం. 18464):

బెంగళూరు నుంచి భువనేశ్వర్ వెళ్లే ప్రశాంతి ఎక్స్‌ప్రెస్ వేళల్లో కూడా స్వల్ప మార్పు జరిగింది. ఈ రైలు సాధారణంగా మధ్యాహ్నం 13:40 గంటలకు (మధ్యాహ్నం 1:40 గంటలకు) బెంగళూరు నుంచి బయలుదేరాల్సి ఉండగా, నేడు మధ్యాహ్నం 14:20 గంటలకు (మధ్యాహ్నం 2:20 గంటలకు) బయలుదేరుతుంది.

3. SMVT బెంగళూరు - హౌరా ఎక్స్‌ప్రెస్ (ట్రెయిన్ నెం. 12864):

ఎస్ఎమ్‌విటి బెంగళూరు నుంచి హౌరా వైపు వెళ్లే ఈ ఎక్స్‌ప్రెస్ రైలు వేళల్లో గణనీయమైన మార్పు వచ్చింది. శనివారం ఉదయం 10:40 గంటలకు బయలుదేరాల్సిన ఈ రైలు, సవరించిన షెడ్యూల్ ప్రకారం నేడు మధ్యాహ్నం 15:30 గంటలకు (మధ్యాహ్నం 3:30 గంటలకు) ఎస్ఎమ్‌విటి బెంగళూరు స్టేషన్ నుంచి ప్రయాణాన్ని ప్రారంభిస్తుంది.

రైళ్ల వేళల్లో జరిగిన ఈ మార్పుల వల్ల ప్రయాణికులకు కలిగిన అసౌకర్యానికి దక్షిణ కోస్తా రైల్వే యంత్రాంగం విచారం వ్యక్తం చేసింది. ప్రయాణికులు తమ ప్రయాణ ప్రణాళికలను ఈ కొత్త వేళలకు అనుగుణంగా మార్చుకోవాలని సూచించింది.