ఇక ఎన్నికల్లో పోటీచేయాలి.. ఆల్ ది బెస్ట్.. ఏపీ స్థానిక పోరుపై సుప్రీంకోర్టు కామెంట్స్

Supreme Court : ఆంధ్రప్రదేశ్ స్థానిక ఎన్నికలపై వైసీపీ పిటిషన్‌పై దేశ అత్యున్నత న్యాయస్థానం సుప్రీంకోర్టు విచారణ చేసింది. ఈ సందర్భంగా కీలక వ్యాఖ్యలు చేసింది.

ఆంధ్రప్రదేశ్‌లో స్థానిక సంస్థల ఎన్నికల ప్రక్రియ, నామినేషన్ల వివాదంపై వైఎస్సార్‌సీపీ దాఖలు చేసిన పిటిషన్‌పై సుప్రీం కోర్టు విచారణ చేసింది. నామినేషన్ల గడువును పొడిగించాలని, ఎన్నికల ప్రక్రియను నిలిపివేయాలని వైసీపీ కోరిన అభ్యర్థనను సుప్రీంకోర్టు తోసిపుచ్చింది. దీనితో ఈ వ్యవహారంలో ప్రతిపక్ష వైఎస్సార్‌సీపీకి నిరాశే ఎదురైంది.

సుప్రీం కోర్టు

భారత ప్రధాన న్యాయమూర్తి జస్టిస్ సూర్యకాంత్ నేతృత్వంలోని ధర్మాసనం ఈ పిటిషన్‌పై సుదీర్ఘ విచారణ జరిపి తుది నిర్ణయం వెలువరించింది. విచారణ సందర్భంగా ధర్మాసనం కీలక వ్యాఖ్యలు చేసింది. "ఎన్నికలను వాయిదా వేయాలనే మీ ఉద్దేశం లేదా ట్రాప్‌లో మేం పడబోం" అని ధర్మాసనం స్పష్టం చేసింది. నామినేషన్ల సమయం ఇప్పటికే ముగిసినందున విచారణను కొనసాగించాల్సిన అవసరం లేదని తేల్చిచెప్పింది. సీజేఐ జస్టిస్ సూర్యకాంత్ స్పందిస్తూ.. "ఇక ఎన్నికల సమయం వచ్చింది.. పోటీ చేయండి, ఆల్ ది బెస్ట్" అని వ్యాఖ్యానిస్తూ వైఎస్సార్‌సీపీ దాఖలు చేసిన పిటిషన్‌పై విచారణను ముగించారు.

తమ పార్టీ అభ్యర్థులను నామినేషన్లు వేయకుండా అధికార పక్షం అడ్డుకుంటోందని, బెదిరింపులకు గురిచేస్తోందని వైఎస్సార్‌సీపీ తరఫు సీనియర్ న్యాయవాది మణిందర్ సింగ్ కోర్టు దృష్టికి తీసుకువచ్చారు. నామినేషన్ల సమయాన్ని పొడిగించి తమకు అవకాశం కల్పించాలని కోరారు.

రాష్ట్ర ఎన్నికల సంఘం తరఫున సొలిసిటర్ జనరల్ తుషార్ మెహతా, ఏపీ ప్రభుత్వం తరఫున సీనియర్ కౌన్సిల్ సిద్ధార్థ లూథ్రా వాదనలు వినిపించారు. గతంలో సుప్రీంకోర్టు ఇచ్చిన మార్గదర్శకాలను పూర్తిస్థాయిలో అమలు చేశామని, పరిశీలనల అనంతరం కొన్ని ప్రాంతాల్లో అర్హత ప్రకారం గడువును కూడా పొడిగించామని ఎన్నికల సంఘం తెలిపింది.

అభ్యర్థులను అడ్డుకున్నారనే ఆరోపణలు పూర్తిస్థాయిలో వాస్తవ పరిశీలనకు సంబంధించిన విషయాలని, వీటిని ఈ దశలో న్యాయస్థానం నేరుగా సమగ్రంగా విచారించి నిర్ణయించలేదని బెంచ్ పేర్కొంది. ఎవరైనా నామినేషన్ల వేసేందుకు అక్రమంగా దూరమయ్యామని భావిస్తే, వారు చట్ట ప్రకారం తగిన ఆధారాలతో ఎలక్షన్ పిటిషన్ ద్వారా తమ హక్కులను క్లెయిమ్ చేసుకోవచ్చని సుప్రీంకోర్టు స్పష్టం చేసింది.

ఎన్నికల ప్రక్రియ పారదర్శకతపై స్పందించిన సుప్రీంకోర్టు, పోలింగ్ కేంద్రాల్లో, నామినేషన్ల కేంద్రాల వద్ద ఏర్పాటు చేసిన సీసీటీవీ కెమెరాల ఫుటేజ్‌ను సురక్షితంగా భద్రపరచాలని రాష్ట్ర ఎన్నికల సంఘాన్ని ఆదేశించింది. భవిష్యత్తులో ఎన్నికల సవాళ్లు లేదా పిటిషన్లు వచ్చినప్పుడు ఈ ఫుటేజ్ సాక్ష్యంగా ఉపయోగపడుతుందని న్యాయస్థానం స్పష్టం చేసింది.