తిరుమల శ్రీవారి నవరాత్రి బ్రహ్మోత్సవాలు - సూర్యప్రభ వాహనంపై దర్శనమిచ్చిన మలయప్పస్వామి

తిరుమల శ్రీవారి సాలకట్ల బ్రహ్మోత్సవాల్లో భాగంగా కోటి సూర్యుల కాంతితో ప్రకాశిస్తూ సూర్యప్రభ వాహనంపై శ్రీ మలయప్పస్వామివారు మాడ వీధుల్లో ఊరేగారు. స్వామివారి దివ్య దర్శనంతో భక్తజనం భక్తిపారవశ్యంలో మునిగితేలారు.

కలియుగ వైకుంఠమైన తిరుమల దివ్య క్షేత్రంలో శ్రీవారి వైభవ ఉత్సవాలు ఆధ్యాత్మిక శోభతో అత్యంత అట్టహాసంగా సాగుతున్నాయి. ఉత్సవాల్లో భాగంగా కోటి సూర్యుల తేజస్సుతో భాసిల్లుతూ శ్రీ మలయప్పస్వామివారు సూర్యప్రభ వాహనంపై అధిరోహించి తిరుమాడ వీధుల్లో ఊరేగుతూ భక్తులకు దివ్య దర్శనమిచ్చారు. శ్రీవారిని కళ్లారా తిలకించిన వేలాది మంది భక్తజనంలో భక్తిపారవశ్యం వెల్లివిరిసింది.

సూర్యప్రభ వాహనంపై తిరుమాడ వీధుల్లో శ్రీ మలయప్పస్వామి

సూర్యప్రభ వాహనం – సకల జీవకోటికి చైతన్యప్రదాత

సూర్యభగవానుడు సకల జీవరాశులకు చైతన్యాన్ని, ప్రకృతికి వెలుగును, జీవకోటికి శక్తిని ప్రసాదించే ఆరోగ్యప్రదాతగా పూజలందుకుంటున్నాడు. సూర్యతేజంతోనే చంద్రుడు సైతం ప్రకాశిస్తున్నాడని పురాణాలు పేర్కొంటాయి.

సూర్యప్రభ వాహనంపై స్వామివారిని దర్శించుకోవడం వల్ల ఆయురారోగ్యాలు, సుఖసంతోషాలు, భోగభాగ్యాలు, సత్సంతాన సంపదలు కలుగుతాయని భక్తుల విశ్వాసం.

రాత్రి చంద్రప్రభ వాహనంపై స్వామివారి విహారం

బ్రహ్మోత్సవాల్లో భాగంగా ఆదివారం(ఇవాళ) రాత్రి 7 గంటలకు చంద్రప్రభ వాహనంపై శ్రీ మలయప్పస్వామివారు తిరుమాడ వీధుల్లో విహరించి భక్తులకు దర్శనమివ్వనున్నారు.

ఈ కార్యక్రమంలో తిరుమల శ్రీశ్రీశ్రీ పెద్దజీయర్ స్వామి, శ్రీశ్రీశ్రీ చిన్నజీయర్ స్వామి, టీటీడీ ఈవో ముద్దాడ రవిచంద్ర, అదనపు ఈవో సీహెచ్ వెంకయ్య చౌదరి, బోర్డు సభ్యులు నన్నపనేని సదాశివరావు, జానకీ దేవి, సీవీఎస్వో మురళీకృష్ణ, ఇతర అధికారులతో పాటు భారీ సంఖ్యలో భక్తులు పాల్గొన్నారు.