తిరుమల శ్రీవారి లడ్డూ ధర పెంపు వార్తలు - టీటీడీ ఇచ్చిన క్లారిటీ ఇదే..!

తిరుమల శ్రీవారి లడ్డూ ధరలు పెరుగుతున్నట్లు కొన్ని వార్తలు ప్రచారమవుతున్నాయి. అయితే దీనిపై టీటీడీ స్పందించింది. ఇలాంటి వార్తల్లో ఎలాంటి వాస్తవం లేదని.. భక్తులు వీటిని నమ్మవద్దని కోరింది. ఈ మేరకు ఛైర్మన్ బీఆర్ నాయుడు ఓ ప్రకటన విడుదల చేశారు.

శ్రీవారి లడ్డూ ప్రసాదాల ధరలను పెంచుతున్నట్లు ప్రచారం జరుగుతోంది. ఈ వార్తల విషయంలో భక్తులు ఆందోళన చెందుతున్నారు. అయితే వీటిపై తిరుమల తిరుపతి దేవస్థానం స్పందించింది. కొందరు అవాస్తవ సమాచారాన్ని ప్రచారం చేస్తున్నారని తెపింది. లడ్డూ ప్రసాదాల ధరలను పెంచే ఆలోచనే లేదని స్పష్టం చేసింది.

ఆ ఆలోచనే లేదు - టీటీడీ ఛైర్మన్

తిరుమల శ్రీవారి లడ్డూ ప్రసాదం

ఇందుకు సంబంధించి టీటీడీ ఛైర్మన్ బీఆర్ నాయుడు ఓ ప్రకటన విడుదల చేశారు. తిరుమల తిరుపతి దేవస్థానముల ప్రతిష్టను, రాష్ట్ర ప్రభుత్వ ప్రతిష్టను దెబ్బతీయాలనే ఉద్దేశ్యంతో ఇలాంటి చౌకబారు వార్తలను ప్రచారం చేయడం తగదన్నారు. ఇలాంటి వార్తలు పూర్తి అబద్దమైనవని చెప్పారు. ఆధారాలు లేని వార్తలని తీవ్రంగా ఖండించారు. ఉద్దేశ్యపూర్వకంగా తప్పుడు వార్తలను ప్రచారం చేస్తే చట్టపరమైన చర్యలు తీసుకుంటామన్నారు. టీటీడీకి లడ్డూ ప్రసాదాల ధరలను పెంచే ఆలోచనే లేదన్నారు.

శ్రీవారి దర్శనం, ఆర్జిత సేవలు, వసతి కోసం దళారులను నమ్మి మోసపోవద్దని టిటిడి ఛైర్మన్ బీఆర్ నాయుడు శనివారం భక్తులకు విజ్ఞప్తి చేశారు. ఇటీవలి కాలంలో కొందరు దళారులు, మధ్యవర్తులు శ్రీవారి దర్శనం పేరుతో భక్తులను పలు మార్గాల ద్వారా మోసం చేస్తున్నట్లు తమ దృష్టికి వచ్చిందన్నారు.

ముఖ్యంగా టిటిడిలోను, ప్రభావిత స్థానాల్లో పనిచేస్తున్న ఉన్నతాధికారులమని కొందరు మాయమాటలతో మెరుగైన శ్రీవారి బ్రేక్ దర్శనం, ఆర్జిత సేవలు, వసతి కల్పిస్తామని ప్రలోభ పెడుతున్నట్లు భక్తుల నుండి ఫిర్యాదులు వస్తున్నాయి. ఇలాంటి నకిలీ వ్యక్తులు భక్తుల నుండి భారీ మొత్తాలు వసూలు చేసి మోసం చేస్తున్నట్లు అనేక ఘటనలు వెలుగులోకి వచ్చాయి. ఇప్పటికే భక్తులను మోసం చేస్తున్న దళారులను టిటిడి గుర్తించి సదరు దళారులపై చట్టపరమైన చర్యలు తీసుకుంటున్నట్లు తెలిపారు.