Tirumala : తిరుమలలో ఆగస్టు 30 నుంచి కారీరిష్టి యాగం, వరుణ జపం

స‌కాలంలో వ‌ర్షాలు కుర‌వాల‌ని శ్రీ‌వారిని ప్రార్థిస్తూ ఆగ‌స్టు 30 నుండి సెప్టెంబర్ 3వ తేదీ వ‌ర‌కు కారీరిష్టి యాగం, వరుణజపం, ప‌ర్జన్యశాంతి హోమాల‌ను టీటీడీ నిర్వహించ‌నుంది టీటీడీ. తిరుమ‌ల ధ‌ర్మగిరి వేద విజ్ఞాన పీఠంలో ఈ కార్యక్రమాలు నిర్వహిస్తారు.

సకాలంలో సమృద్ధిగా వర్షాలు కురిసి, పంటలు బాగా పండి దేశం సుభిక్షంగా ఉండాలని కాంక్షిస్తూ తిరుమల తిరుపతి దేవస్థానం (టీటీడీ) కీలక నిర్ణయం తీసుకుంది. తిరుమల క్షేత్రంలో ఆగస్టు 30 నుండి సెప్టెంబర్ 3 వరకు ఐదు రోజుల పాటు 'కారీరిష్టి యాగం', 'వరుణ జపం', అలాగే 'పర్జన్య శాంతి హోమం' వేడుకగా నిర్వహించనున్నట్లు ప్రకటించింది.

తిరుమల శ్రీవారి ఆలయం

సోమవారం విడుదల చేసిన ఒక ప్రకటనలో టీటీడీ ఈ విషయాలను వెల్లడించింది. తిరుమలలోని ధర్మగిరి వేద విజ్ఞాన పీఠం వేదికగా ఈ ప్రత్యేక వైదిక క్రతువులు జరగనున్నాయి. ఈ ఆధ్యాత్మిక యజ్ఞంలో భాగంగా సెప్టెంబర్ 3వ తేదీన 'మహా పూర్ణాహుతి' క్రతువును అత్యంత నిష్ఠతో నిర్వహించనున్నారు.

ఈ యాగంలో మొత్తం 32 మంది వేద, శ్రౌత, స్మార్త పండితులు పాల్గొని మంత్రోచ్ఛారణలతో హోమాలు జరుపుతారు. ధర్మగిరి వేద విజ్ఞాన పీఠం ప్రిన్సిపల్ కుప్పా శివసుబ్రహ్మణ్య అవధాని పర్యవేక్షణలో ఈ కార్యక్రమానికి సంబంధించిన ఏర్పాట్లు శరవేగంగా జరుగుతున్నాయి.

రాష్ట్రంలోని ఇతర ప్రముఖ దేవాలయాల్లో ఇప్పటికే వర్షాల కోసం యాగాలు నిర్వహించడం, టీటీడీ నిర్ణయంపై సర్వత్రా చర్చ నడవడమే ఈ నిర్ణయానికి కారణంగా కనిపిస్తోంది. శ్రీశైలం దేవస్థానంలో ఆగస్టు 7 నుంచి 11 వరకు ఐదు రోజుల పాటు వరుణ యాగం ఘనంగా జరిగింది. అలాగే విజయవాడలోని శ్రీ దుర్గా మల్లేశ్వర స్వామి దేవస్థానంలో ఆగస్టు 14 నుండి 16 వరకు వరుణ యాగం, వరుణ జపం, ఘటాభిషేకం వేడుకగా నిర్వహించారు.

తక్కువ వర్షపాతం నమోదైన సందర్భాల్లో టీటీడీ ఇలాంటి ప్రత్యేక పూజలు నిర్వహించడం ఇదే మొదటిసారి కాదు. గతంలో 2014, 2015, 2017 సంవత్సరాల్లో కారీరిష్టి, పర్జన్య శాంతి, వరుణ యాగాలను ఆధ్యాత్మిక నిష్ఠతో నిర్వహించింది. 2023 సంవత్సరంలో కూడా ఆగస్టు 21 నుండి 26 వరకు ధర్మగిరిలో వరుణ యాగాన్ని చేపట్టింది. అదే ఏడాది సెప్టెంబర్ 8 నుంచి 11 వరకు శ్రీనివాస మంగాపురంలో మూడు రోజుల పాటు 'శ్రీ శ్రీనివాస అష్టోత్తర శతకుండాత్మక మహా శాంతి వరుణ యాగం' విజయవంతంగా నిర్వహించింది.

ఈ యాగాల ద్వారా వర్షభగవానుని కృప లభించి, సమస్త జీవకోటికి తాగునీరు, సాగునీరు సమృద్ధిగా అందుతాయని భక్తులు విశేషంగా నమ్ముతారు.