Tirumala : తిరుమల శ్రీవారి హుండీ బియ్యం ఈ-వేలం... ఇలా దక్కించుకోవచ్చు

TTD hundi rice e Auction : తిరుమల శ్రీవారి ఆలయంతో పాటు ఇతర అనుబంధ ఆలయాల హుండీల ద్వారా భక్తులు సమర్పించిన మిక్స్‌డ్ రైస్‌ను జూన్ 11న టీటీడీ ఈ-వేలం వేయనుంది. ఆసక్తి గల వారు జూన్ 10 లోపు ఈఎండీ చెల్లించాల్సి ఉంటుంది.

TTD hundi rice e Auction : కలియుగ వైకుంఠం తిరుమల శ్రీవారిని దర్శించుకునేందుకు దేశ విదేశాల నుండి నిత్యం లక్షలాది మంది భక్తులు తరలివస్తుంటారు. భక్తులు తమ మొక్కుల రూపంలో స్వామివారి హుండీలో నగదు, బంగారంతో పాటు వివిధ రకాల వస్తువులను సమర్పిస్తుంటారు.

శ్రీవారి హుండీ బియ్యం ఈ-వేలం

ఈ క్రమంలోనే తిరుమల శ్రీవారి ప్రధాన ఆలయంతో పాటు తిరుమల తిరుపతి దేవస్థానం (TTD) అనుబంధ ఆలయాల హుండీల ద్వారా భక్తులు భారీగా బియ్యాన్ని కానుకగా సమర్పించారు. ఇలా సేకరించిన మిక్స్‌డ్ రైస్‌ను (మిశ్రమ బియ్యం) బహిరంగ ఈ-వేలం ద్వారా విక్రయించేందుకు టీటీడీ అధికారులు సర్వం సిద్ధం చేశారు. జూన్ 11వ తేదీన ఈ ఆన్‌లైన్ వేలం ప్రక్రియను నిర్వహించనున్నారు.

20 లాట్లలో బియ్యం….

హుండీల ద్వారా లభించిన ఈ బియ్యాన్ని అధికారులు రకాల వారీగా వర్గీకరించి వేలానికి ఉంచారు. మొత్తం 20 లాట్లలో సుమారు 7,938 కిలోల మిక్స్‌డ్ రైస్‌ను పారదర్శక విధానంలో విక్రయించనున్నారు. వ్యాపారులు, ఆసక్తి కలిగిన కొనుగోలుదారులు ఈ డిజిటల్ వేలంలో పాల్గొని బియ్యాన్ని దక్కించుకోవచ్చు.

• ఈ-వేలంలో పాల్గొనాలని భావించే వేలంపాటదారులు ముందస్తుగా కొంత మొత్తాన్ని డిపాజిట్ చేయాల్సి ఉంటుంది.
• దరఖాస్తుదారులు జూన్ 10వ తేదీ ఉదయం 10:00 గంటలలోపు ప్రభుత్వ అధికారిక కొనుగోలు పోర్టల్ ద్వారా రూ. 50,000 ఈఎండీ (Earnest Money Deposit - EMD) చెల్లించాలి.
• నిర్ణీత గడువులోగా ఈఎండీ సొమ్మును జమ చేసిన వారు మాత్రమే జూన్ 11న జరిగే ఆన్‌లైన్ వేలం పాటలో పాల్గొనడానికి అర్హత సాధిస్తారు.

సంప్రదించాల్సిన నంబర్లు

ఈ వేలం ప్రక్రియకు సంబంధించిన నిబంధనలు, ఇతర అదనపు సమాచారం తెలుసుకోవాలనుకునే వారు తిరుపతిలోని టీటీడీ మార్కెటింగ్ కార్యాలయాన్ని నేరుగా సంప్రదించవచ్చు. కార్యాలయ పని వేళల్లో అధికారులు అందుబాటులో ఉంటారు.

సమాచారం కోసం 0877-2264429 ల్యాండ్‌లైన్ నంబర్‌కు ఫోన్ చేసి వివరాలు అడగవచ్చు. అలాగే భక్తులు, వ్యాపారుల సౌకర్యార్థం టీటీడీ అధికారిక వేలం వెబ్‌సైట్ www.konugolu.ap.gov.in ను కూడా నిరంతరం అందుబాటులో ఉంచారు. ఈ పోర్టల్‌ను సందర్శించి నిబంధనల పత్రాన్ని డౌన్లోడ్ చేసుకోవచ్చు.