ఆంధ్రప్రదేశ్‌లో జులై నెల వర్షపాతం ఎక్కువ ఉందా? తక్కువ ఉందా? ఐఎండీ అంచనా!

ఈసారి ఎల్‌నినో ప్రభావం భారతదేశం మీద స్పష్టంగా కనిపించనుంది. అయితే జులై నెలలో ఆంధ్రప్రదేశ్ రాష్ట్రంలో వర్షాలు ఎలా ఉన్నాయి? వాతావరణం అంచనా ఇక్కడ తెలుసుకోండి.

జులై నెలలో ఆంధ్రప్రదేశ్‌లో సాధారణం లేదా సాధారణం కంటే తక్కువ వర్షపాతం నమోదయ్యే అవకాశం ఉంది. రాష్ట్రంలోని చాలా ప్రాంతాల్లో సాధారణం కంటే తక్కువ వర్షపాతం కురిసే సూచనలు ఉన్నాయి. భారత వాతావరణ శాఖ విడుదల చేసిన వర్షపాత అంచనాల ప్రకారం.. రాయలసీమ, తీరప్రాంతాల్లోని కొన్ని ప్రాంతాల్లో సాధారణ వర్షపాతం నమోదయ్యే అవకాశం ఉంది. అయితే రాష్ట్రంలోని మిగిలిన ప్రాంతాల్లో సాధారణం కంటే తక్కువ వర్షపాతం కురిసే అవకాశం ఉంది.

ఐఎండీ జులై వాతావరణం అంచనా

దేశంలోని చాలా ప్రాంతాల మాదిరిగానే.. ఆంధ్రప్రదేశ్‌లో కూడా ఈ నెలలో గరిష్ట, కనిష్ట ఉష్ణోగ్రతలు సాధారణం కంటే ఎక్కువగా ఉండే అవకాశం ఉంది. అయితే ఉష్ణోగ్రతల్లో ఎంతమేర వ్యత్యాసం ఉంటుందనే దానిపై వాతావరణ నిపుణులు ఇంకా స్పష్టమైన అంచనాను వెల్లడించలేదు.

'కొన్ని రోజులు సాధారణం కంటే ఎక్కువ వేడిగానూ, మరికొన్ని రోజులు సాధారణం కంటే చల్లగానూ ఉండే అవకాశం ఉంది. కానీ ఉష్ణోగ్రతలు నిరంతరం అధికంగా ఉండవు. ప్రస్తుతం ఉష్ణోగ్రతల అంశం నుండి వర్షపాతం వైపు మళ్లాయి.' అని ఐఎండీ అధికారులు చెబుతున్నారు. ఆగస్టు, సెప్టెంబర్ నెలల్లో మరింత ప్రభావవంతంగా ఉండే ఎల్ నినో పరిస్థితుల ప్రభావంతో కూడిన వర్షపాత సరళిపై నిపుణులు ఇప్పుడు దృష్టి సారించారు.

వాతావరణ నిపుణులు ముందుగా అంచనా వేసినట్లుగానే జూన్ నెలలో రాష్ట్రంలో సాధారణ స్థాయికి దగ్గరగా వర్షపాతం నమోదైంది. భారత వాతావరణ శాఖ (IMD) గణాంకాల ప్రకారం జూన్ 1 నుండి 30 మధ్య అల్లూరి సీతారామరాజు జిల్లాలో అత్యధిక వర్షపాతం నమోదు అయింది. పార్వతీపురం మన్యం, శ్రీకాకుళం, అన్నమయ్య, పశ్చిమ గోదావరి జిల్లాల్లో వర్షపాతం లోపం కనిపించింది. మిగిలిన జిల్లాల్లో ఈ కాలంలో సాధారణ లేదా అధిక వర్షపాతం నమోదైంది.

తేలికపాటి జల్లులు కురిసిన విశాఖపట్నం జిల్లా మినహా మిగిలిన ప్రాంతాల్లో వాతావరణం పొడిగా ఉంది. జూలై 3 వరకు రాష్ట్రంలో ఉరుములతో కూడిన వర్షాలు, తేలికపాటి జల్లులు కురిసే అవకాశం ఉంది. జూలై 4 నుండి కోస్టల్ ఆంధ్రప్రదేశ్‌లో అక్కడక్కడా భారీ వర్షాలు కురిసే అవకాశం ఉందని ఐఎండీ హెచ్చరించింది.